എലിപ്പനി ജീവനെടുക്കുന്നത് തുടരുന്നു; ഇന്ന് 5 മരണം

തിരുവനന്തപുരം: കേരളത്തിൽ ഇന്ന് എലിപ്പനി ബാധിച്ച് അഞ്ച് മരണം കൂടി. പത്തനംതിട്ട റാന്നി സ്വദേശി രഞ്ജു, കോഴിക്കോട് എരഞ്ഞിക്കൽ സ്വദേശി അനിൽ കുമാര്‍ (54), വടകര സ്വദേശിനി നാരായണി (80), തൊടുപുഴ ഒളമറ്റം സ്വദേശി ജോസഫ് മാത്യു (58), കല്ലായി അശ്വനി ഹൗസിൽ രവി (59) എന്നിവരാണ് ഇന്ന് മരിച്ചത്.

പ്രളയബാധിത പ്രദേശങ്ങളിൽ ശുചീകരണപ്രവര്‍ത്തനങ്ങളിൽ പങ്കെടുത്തവരാണ് രഞ്ജുവും അനിൽ കുമാറും. കോട്ടയം മെ‍ഡിക്കൽ കോളേജിൽ ചികിത്സയിലായിരുന്നു മരിച്ച ജോസഫ് മാത്യു. ഇന്നുണ്ടായ അഞ്ചിൽ മൂന്ന് മരണങ്ങളും കോഴിക്കോട് ജില്ലയിലാണ്.

ഞായറാഴ്ച മാത്രം സംസ്ഥാനത്ത് പത്തുപേര്‍ എലിപ്പനി ബാധിച്ച് മരിച്ചിരുന്നു. ഇതോടെ നാലു ദിവസത്തിനകം എലിപ്പനി ബാധിച്ച് മരിച്ചവരുടെ എണ്ണം 35 ആയി. ആരോഗ്യവകുപ്പ് പുറത്തുവിടുന്ന കണക്കുകള്‍ പ്രകാരം സംസ്ഥാനത്ത് വിവിധ ആശുപത്രികളിൽ എലിപ്പനി ലക്ഷണങ്ങളോടെ പ്രവേശിപ്പിക്കപ്പെട്ട 68 പേരിൽ 33 പേര്‍ക്ക് രോഗം സ്ഥിരീകരിച്ചിട്ടുണ്ട്. തൃശൂര്‍ മെഡിക്കൽ കോളേജ് ആശുപത്രിയിൽ മാത്രം 54 പേര്‍ രോഗലക്ഷണങ്ങളോടെ ചികിത്സയിലുണ്ട്. ഇതുവരെ 14 പേര്‍ക്കാണ് ഇവിടെ രോഗം സ്ഥിരീകരിച്ചിട്ടുള്ളത്. ആലപ്പുഴയിൽ മൂന്ന് പേര്‍ക്കും കോട്ടയത്ത് രണ്ട് പേര്‍ക്കും കാസര്‍കോട് ഒരാള്‍ക്കും എലിപ്പനി സ്ഥിരീകരിച്ചിട്ടുണ്ട്.