ചികിത്സ കിട്ടാതെ രോഗി മരിച്ചു; മഴയിൽ മരണം ആറായി

കൊച്ചി; കനത്ത മഴയെത്തുടര്‍ന്ന് സംസ്ഥാനമൊട്ടാകെ ദുരിതം തുടരുന്നു. ഒഡീഷ തീരത്തെ ന്യൂനമര്‍ദം മൂലം ശക്തമായ പടിഞ്ഞാറൻ കാറ്റിന്‍റെ ഫലമായുണ്ടാകുന്ന മഴ വ്യാഴാഴ്ച വരെ തുടരുമെന്നാണ് കാലാവസ്ഥാ മുന്നറിയിപ്പ്. തിരുവനന്തപുരം മുതൽ തൃശൂര്‍ വരെയുള്ള എട്ടുജില്ലകളിൽ വിദ്യാഭ്യാസസ്ഥാപനങ്ങള്‍ക്ക് അവധി പ്രഖ്യാപിച്ചിട്ടുണ്ട്.

മഴയെത്തുടര്‍ന്ന് എറണാകുളം ജില്ലയിൽ കുട്ടമ്പുഴയിൽ ചപ്പാത്ത് മുങ്ങിയതുമൂലം ആശുപത്രിയിലെത്തിക്കാനാകാതെ രോഗി മരിച്ചു. രാത്രി നെഞ്ചുവേദന അനുഭവപ്പെട്ട പുളിയനാനിക്കൽ ടോമി (55) ആണ് ആശുപത്രിയിലെത്തിക്കാൻ വൈകിയതുമൂലം മരിച്ചത്. ഏറെ വൈകി മണികണ്ഠൻചാൽ കടത്ത് വഴി ടോമിയെ വഞ്ചിയിൽ മറുകരയിലെത്തിച്ച് കോതമംഗലത്ത് ആശുപത്രിയിലെത്തിച്ചെങ്കിലും യാത്രാമധ്യേ മരിക്കുകയായിരുന്നു.

കോട്ടയം മണിമലയാറ്റിൽ വീണ ഒരാളും മരിച്ചതായി റിപ്പോർട്ടുണ്ട്.

പുനലൂര്‍ - മുവാറ്റുപുഴ റോഡിൽ ചെത്തോങ്കരയിലും വെള്ളം കയറിയിട്ടുണ്ട്. മഴ കനത്തതോടെ പെരിയാര്‍, മീനച്ചിലാര്‍, പമ്പ നദികളും കരകവിഞ്ഞൊഴുകുകയാണ്.