ശബരിമല ദര്‍ശനത്തിന് അനുമതി തേടി 550 യുവതികള്‍

തിരുവനന്തപുരം: ശബരിമല ദര്‍ശനത്തിന് അനുമതി തേടി പോലീസ് പോര്‍ട്ടലിൽ രജിസ്റ്റര്‍ ചെയ്തത് 550 യുവതികള്‍. കേരളത്തിനകത്തുനിന്നും പുറത്തുനിന്നുമുള്ളവരാണ് ദര്‍ശനാനുമതി തേടി സമീപിച്ചിരിക്കുന്നത്. ഇതുവരെ മൂന്നര ലക്ഷം പേര്‍ തീര്‍ത്ഥാടനത്തിനായി ബുക്ക് ചെയ്തിട്ടുണ്ടെന്നും ഇനിയും കൂടുതൽ പേര്‍ സമീപിക്കുമെന്ന് കരുതുന്നതായും പോലീസ് അറിയിച്ചു.

ബുക്ക് ചെയ്തവരുടെ വിവരങ്ങള്‍ വെബ്‍‍സൈറ്റിൽ പരസ്യപ്പെടുത്തിയിട്ടില്ല. ശബരിമല യുവതീപ്രവേശനം സംബന്ധിച്ച കോടതി വിധി നടപ്പാക്കുന്നതിനെതിരെ കനത്ത പ്രതിഷേധവും അക്രമസംഭവങ്ങളും തുടരുന്നതിനിടെയാണ് ഇത്രയധികം യുവതികള്‍ ദര്‍ശനത്തിനായി സമീപിച്ചിരിക്കുന്നത്.

ശബരിമലയിൽ തിരക്ക് കുറയ്ക്കുന്നതിന്‍റെ ഭാഗമായാണ് കേരള പോലീസ് ദര്‍ശനത്തിനായി ഓൺലൈൻ പോര്‍ട്ടൽ തുടങ്ങിയത്. നിലയ്ക്കലിൽ നിന്ന് പമ്പയിലേയ്ക്കുള്ള കെഎസ്ആര്‍ടിസി ബസ് ടിക്കറ്റും പോര്‍ട്ടലിൽ ലഭ്യമാക്കിയിരുന്നു.

നിരവധി പേരാണ് തങ്ങളെ ആശങ്കയോടെ വിളിക്കുന്നതെന്നും എന്നാൽ ശബരിമലയിൽ യാതൊരു ആശങ്കയുടെയും ആവശ്യമില്ലെന്നും ഡിജിപി ലോക്നാഥ് ബെഹ്റ മുൻപ് പറഞ്ഞിരുന്നു. സുരക്ഷിതമായ ദര്‍ശനത്തിന് എല്ലാവിധ ക്രമീകരണങ്ങളും നടത്തിയിട്ടുണ്ടെന്നും പോലീസ് അറിയിച്ചിരുന്നു. ശബരിമലയിൽ സ്ത്രീപ്രവേശനം അനുവദിച്ച സുപ്രീം കോടതി വിധിയ്ക്ക് പിന്നാലെയാണ് പോലീസ് ദര്‍ശനത്തിനായി ഓൺലൈൻ സംവിധാനം ഒരുക്കിയത്.