സംസ്ഥാന സ്കൂൾ കലോത്സവം ഇന്നുമുതൽ

തൃശൂര്: സംസ്ഥാന സ്കൂള് കലോത്സവത്തിന് ഇന്നു തൃശൂര് തേക്കിന്കാട് മൈതാനത്ത് കൊടിയുയരും. മത്സരങ്ങള് നാളെ ആരംഭിക്കും. ഏറെ മാറ്റങ്ങളോടെയാണ് ഇത്തവണ കലോത്സവം അരങ്ങേറുന്നതെന്ന് വിദ്യാഭ്യാസമന്ത്രി സി. രവീന്ദ്രനാഥ് പത്രസമ്മേളനത്തില് പറഞ്ഞു. തേക്കിന്കാട് മൈതാനത്തെ പ്രധാനവേദിക്കു സമീപം ഇന്നു രാവിലെ 9.30ന് പൊതുവിദ്യാഭ്യാസ ഡയറക്ടര് കെ.വി. മോഹന്കുമാര് പതാകയുയര്ത്തും. പത്തു മുതല് രജിസ്ട്രേഷന് ആരംഭിക്കും.

കലോത്സവത്തിന്റെ ഭാഗമായ പൈതൃകവിളംബരം ജാഥ മൂന്നിന് പാറമേക്കാവ് ക്ഷേത്രത്തിനു മുന്നില്നിന്നാരംഭിക്കും. ഉദ്ഘാടനം മന്ത്രി വി.എസ്. സുനില്കുമാര് നിര്വഹിക്കും. മന്ത്രിമാരായ എ.സി. മൊയ്തീന്, സി. രവീന്ദ്രനാഥ് തുടങ്ങിയവര് പങ്കെടുക്കും. വിളംബരജാഥയുടെ ഫ്ളാഗ് ഓഫ് ഉച്ചയ്ക്ക് 2.30-ന് ഐ.ജി. എം.ആര്. അജിത് നിര്വഹിക്കും.