നടിയെ ആക്രമിച്ച കേസ്: പ്രതി കോടതി മുറിയിലെ ദൃശ്യങ്ങള്‍ പകര്‍ത്തി, ഫോണ്‍ പിടിച്ചെടുത്തു

കൊച്ചി: നടിയെ ആക്രമിച്ച കേസുമായി ബന്ധപ്പെട്ട് വിചാരണ നടക്കുന്ന കോടതി മുറിയിലെ ദൃശ്യങ്ങള്‍ പ്രതി മൊബൈല്‍ ഫോണില്‍ പകര്‍ത്തി. ദിലീപടക്കമുള്ള പ്രതികള്‍ കോടതി മുറിയില്‍ നില്‍ക്കുന്നതും ഒന്നാം സാക്ഷിയായ നടി കോടതിയിലെത്തിയ വാഹനത്തിന്റെ ചിത്രങ്ങളുമാണ് ഫോണിലുണ്ടായിരുന്നത്. ദൃശ്യങ്ങള്‍ പകര്‍ത്തിയ അഞ്ചാം പ്രതി സലീമിന്റെ ഫോണ്‍ പോലീസ് സംഘം പിടിച്ചെടുത്തു.

സലീമിന്റെ മൊബൈലില്‍ നിന്നാണ് കോടതി മുറിക്കകത്തെ ദൃശ്യങ്ങള്‍ കിട്ടിയത്. അഞ്ചാം പ്രതി ഫോണില്‍ ചിത്രങ്ങളെടുക്കുന്നത് പ്രോസിക്യൂഷനാണ് പോലീസിനെ അറിയിച്ചത്. ഉടന്‍ തന്നെ ഇയാളില്‍ നിന്ന് പോലീസ് ഫോണ്‍ കണ്ടെത്തി.

ആക്രമിക്കപ്പെട്ട നടിയുടെ സ്വകാര്യത കണക്കിലെടുത്ത് അടച്ചിട്ട മുറിയിലാണ് വിചാരണ നടപടികള്‍ നടക്കുന്നത്. കോടതി മുറിയില്‍ മൊബൈല്‍ അടക്കമുള്ള വസ്തുക്കള്‍ക്ക് കോടതി വിലക്ക് ഏര്‍പ്പെടുത്തിയിട്ടുണ്ട്. കോടതി നടപടികളുമായി ബന്ധപ്പെട്ട ചിത്രങ്ങള്‍ എടുക്കുന്നതിനും വിലക്കുണ്ട്. ഈ പശ്ചാത്തലത്തിലാണ് പ്രതി സലീമും സുഹൃത്തായ ആിക്കും കോടതി ഉത്തരവ് ലംഘിച്ചതായി പോലീസ് കണ്ടെത്തിയത്.