കെഎസ്ആര്‍ടിസിയിൽ കൂട്ടരാജി; ജോലി ഉപേക്ഷിച്ചത് 606 പേര്‍

തിരുവനന്തപുരം: മറ്റു വകുപ്പുകളിൽ മികച്ച ശമ്പളമുള്ള ജോലി ലഭിച്ച 606 പേര്‍ കെഎസ്ആര്‍ടിസിയിൽ നിന്നു രാജി വെച്ചതായി റിപ്പോര്‍ട്ട്. ഇത്രയും പേര്‍ ജോലി ഉപേക്ഷിച്ചു പോകുന്നത് കെഎസ്ആര്‍ടിസിയുടെ ചരിത്രത്തിലാദ്യമാണ്. തുടര്‍ച്ചയായി ശമ്പളം മുടങ്ങുന്നതും പെൻഷൻ കിട്ടാതാവുന്നതുമാണ് കെഎസ്ആര്‍ടിസി ജോലി ഉപേക്ഷിച്ച് മറ്റു ജോലികള്‍ തേടാൻ ജീവനക്കാരെ പ്രേരിപ്പിക്കുന്നത്.

അതേസമയം മറ്റു ജോലികള്‍ കിട്ടിയവരാണ് രാജിവെക്കുന്നതെന്നും ഇത് സാധാരണമാണെന്നുമാണ് മാനേജ്മെന്‍റിന്‍റെ നിലപാട്. എല്ലാ മാസവും കുറഞ്ഞത് 10 പേരെങ്കിലും കെഎസ്ആര്‍ടിസിയിൽ നിന്ന് രാജിവെക്കാറുണ്ടെന്നാണ് മാനേജ്മെന്‍റ് പറയുന്നത്.

വിവിധ കാലയളവിൽ രാജി സമര്‍പ്പിച്ചിരുന്ന അസിസ്റ്റന്‍റ് ഡിപ്പോ എന്‍ജിനീയര്‍, കണ്ടക്ടര്‍, ഡ്രൈവര്‍, മെക്കാനിക്ക് ഗ്രേഡ് 2, ബ്ലാക്ക്സ്മിത്ത്, പെയിന്‍റര്‍, ജൂനിയര്‍ അസിസ്റ്റന്‍റ്, ഗാര്‍ഡ്, പ്ലൂണ്‍, സ്റ്റോര്‍ ഇഷ്യൂവര്‍ എന്നീ തസ്തികകളിൽ ജോലി ചെയ്തിരുന്നവരുടെ അപേക്ഷ സ്വീകരിക്കാതെ നീട്ടിക്കൊണ്ടു പോകുകയായിരുന്നു. ഇത് ശ്രദ്ധയിൽപ്പെട്ടതിനെത്തുടര്‍ന്ന് നടപടിയെടുക്കുകയായിരുന്നുവെന്നാണ് കെഎസ്ആര്‍ടിസി അധികൃതരുടെ വിശദീകരണം.