ഓഖി: അന്യസംസ്ഥാനങ്ങളിൽ കുടുങ്ങിയ 79 പേര്‍ നാട്ടിലേയ്ക്ക്

കൊച്ചി: അന്യസംസ്ഥാനതീരങ്ങളിൽ കുടുങ്ങിയ 79 മത്സ്യത്തൊഴിലാളികള്‍ തിരുവനന്തപുരത്തേയ്ക്ക് തിരിച്ചു. ലക്ഷദ്വീപ്, മഹാരാഷ്ട്ര തീരങ്ങളിൽ കുടുങ്ങിയ മലയാളികള്‍ ഉള്‍പ്പെടെയുള്ളവരാണ് തിരിച്ചിട്ടുള്ളത്.

ഇന്നു പുലര്‍ച്ചെയോടെ ലക്ഷദ്വീപിൽ കുടുങ്ങിയ 185 മത്സ്യത്തൊഴിലാളികള്‍ കൊച്ചിയിലെത്തിയിരുന്നു. പത്തു ബോട്ടുകളിലായി എത്തിയവരിൽ 26 മലയാളികളുമുണ്ട്.

ചുഴലിക്കാറ്റിനെത്തുടർന്നു വിവിധ സംസ്ഥാനങ്ങളിൽ എത്തിപ്പെട്ട, കേരളത്തിൽനിന്നുള്ള മൽസ്യത്തൊഴിലാളികളെയും ബോട്ടുകളെയും തിരികെ നാട്ടിലെത്തിക്കുന്നതിനുള്ള അടിയന്തര നടപടികൾ സ്വീകരിച്ചുവരികയാണെന്നു ഫിഷറീസ് ഡയറക്ടർ അറിയിച്ചു. അതതു സംസ്ഥാനങ്ങളിലെ ദുരന്ത നിവാരണ അതോറിറ്റികളുമായും സ്ഥലത്തെ കലക്ടർമാരുമായും ബന്ധപ്പെട്ടു മൽസ്യത്തൊഴിലാളികൾക്കാവശ്യമായ സൗകര്യങ്ങളും ദൈനംദിന ചെലവിനുള്ള തുകയും ഏര്‍പ്പെടുത്തുകയും ബോട്ടുകൾ തിരിച്ചെത്തിക്കാനുള്ള ഡീസൽ അനുവദിക്കുകയും ചെയ്തിട്ടുണ്ട്.

ഓഖി ചുഴലിക്കാറ്റിനെത്തുടര്‍ന്ന് കര്‍ണാടകയിൽ 42 ബോട്ടുകളിലായി 241 മത്സ്യത്തൊഴിലാളികളും ഗോവയിൽ എട്ടു ബോട്ടുകളിലായി 62 മത്സ്യത്തൊഴിലാളികളുമാണ് എത്തിച്ചേര്‍ന്നിട്ടുള്ളത്. മഹാരാഷ്ട്രയിൽ 61 ബോട്ടുകളും 115 മത്സ്യത്തൊഴിലാളികളുമാണ് എത്തിച്ചേര്‍ന്നത്. മത്സ്യത്തൊഴിലാളികളെ തിരിച്ച് നാട്ടിലെത്തിക്കുന്നതുമായി ബന്ധപ്പെട്ട നടപടികള്‍ക്കായി ഫിഷറീസ് വകുപ്പിലെ നാല് ഉന്നത ഉദ്യോഗസ്ഥരെ നേരത്തെ അയച്ചിരുന്നു.