അഴീക്കലില്‍ യാത്രാബോട്ട് അപകടത്തില്‍പ്പെട്ടു; യാത്രക്കാരെ രക്ഷപ്പെടുത്തി

കണ്ണൂര്‍: കണ്ണൂര്‍ അഴീക്കലില്‍ യാത്രാബോട്ട് അപകടത്തില്‍ പെട്ടു. അഴീക്കലില്‍ നിന്ന് മാട്ടൂലിലേക്ക് പുറപ്പെട്ട യാത്രാ ബോട്ടാണ് എന്‍ജിന്‍ കേടായി അപകടത്തില്‍പ്പെട്ടത് . ബോട്ട് കടലിലേക്ക് ഒഴുകിപ്പോവുകയായിരുന്നു. അപകടം ശ്രദ്ധയില്‍പ്പെട്ട മത്സ്യത്തൊഴിലാളികള്‍ ഫൈബര്‍ ബോട്ടുകള്‍ ഉപയോഗിച്ച് യാത്രക്കാരെ മുഴുവന്‍ രക്ഷപെടുത്തി. ആര്‍ക്കും പരിക്കില്ല.

ഞായറാഴ്ച ഉച്ചക്ക് ഒന്നരയോടെയാണ് അപകടം. മാട്ടൂലിലേക്ക് പുറപ്പെട്ട ബോട്ട് അഴീക്കല്‍ തുറമുഖത്തിന് സമീപം എത്തിയപ്പോള്‍ എന്‍ജിന്‍ ഓഫായി. തുടര്‍ന്ന് തിരയില്‍പ്പെട്ട ബോട്ട് കടലിലേക്ക് നീങ്ങുകയായിരുന്നു.

സ്ത്രീകള്‍ ഉള്‍പ്പെടെ 38 യാത്രക്കാരാണ് ബോട്ടില്‍ ഉണ്ടായിരുന്നതെന്നാണ് വിവരം. എന്നാല്‍,അപകടം ഉണ്ടായിട്ടും കോസ്റ്റല്‍ പോലീസ് ഉള്‍പ്പെടെയുള്ളവര്‍ അപകട സ്ഥലത്ത് എത്തിയില്ലെന്ന് നാട്ടുകാര്‍ ആരോപിച്ചു.