തോരാത്ത കണ്ണീരിനൊടുവിൽ ആശ്വാസമായി അവൻ പിറന്നു: 'അഭിമന്യു'

കൊച്ചി: മഹാരാജാസ് കോളജിൽ വെച്ച് കൊല്ലപ്പെട്ട അഭിമന്യുവിന്റെ സഹോദരിക്ക് ആൺകുഞ്ഞ് പിറന്നു. അഭിമന്യുവിന്റെ ഓർമയിൽ കുഞ്ഞിന് അഭിമന്യു എന്ന പേര് നൽകി. അന്തരിച്ച സിപിഎം നേതാവ് സൈമൺ ബ്രിട്ടോയുടെ ഭാര്യ സീന ഭാസ്കറാണ് ഫേസ്ബുക് പോസ്റ്റിലൂടെ അഭിമന്യുവിന്റെ ചേച്ചി കൗസല്യ പ്രസവിച്ചതായി അറിയിച്ചത്.

അഭിമന്യുവിന്റെ സഹോദരൻ സീനയെ ഫോണിൽ വിളിച്ച് ചേച്ചിക്ക് ആൺകുഞ്ഞ് പിറന്നതായി അറിയിച്ചു. രണ്ടരക്കിലോ തൂക്കമുള്ള കുഞ്ഞിന് അഭിമന്യു എന്ന് പേരിടാൻ താൻ പറഞ്ഞതായും സീന ഭാസ്‌കർ കുറിച്ചു. അടിമാലി ആശുപത്രിയിൽ കുഞ്ഞും അമ്മയും സുഖമായിരിക്കുന്നു. ഈ കുഞ്ഞിന്റെ വരവ് കഴിഞ്ഞ ഒരു വർഷത്തെ തോരാത്ത കണ്ണുനീരിന് ചെറിയൊരാശ്വാസമാകുമെന്നും സീന പ്രതീക്ഷ പ്രകടിപ്പിച്ചു. തോരാത്ത കണ്ണീരിന് ആശ്വസമേകാൻ കഴിയട്ടെയെൻ പൊൻതങ്കക്കുടത്തിന് എന്ന് ആശംസിച്ചു കൊണ്ടാണ് സീന പോസ്റ്റ് അവസാനിപ്പിക്കുന്നത്.

പോസ്റ്റിന്റെ പൂർണരൂപം വായിക്കാം: ഇന്നുച്ചയ്ക്ക് (7/8/2019)രണ്ടര മണിയ്ക്ക് ചേച്ചീ എന്ന വിളിയോടെ ഫോണിന്റെ മറുതലയ്ക്കൽ പരിജിത്.... സ്നേഹസമ്പന്നനായ പ്രിയ രക്തസാക്ഷി അഭിമന്യുവിന്റെ സഹോദരൻ എന്നോട് പറഞ്ഞു " ഒരു നല്ല വാർത്തയുണ്ട് " എന്താണ്; "എന്റെ പെങ്ങൾ അഭിമന്യുവിന്റെ ചേച്ചി പ്രസവിച്ചു... ആൺകുഞ്ഞ്... രണ്ടര കിലോ തൂക്കമുള്ള കുട്ടിയ്ക്ക് അഭിമന്യു എന്ന് പേരിടണമെന്ന് ഞാൻ പറഞ്ഞു.... അതേ ചേച്ചി അങ്ങനെയെ പേരിടൂ.... അടിമാലി താലൂക്ക് ആശുപത്രിയിൽ അമ്മയും കുഞ്ഞും സുഖമായിരിയ്ക്കുന്നു...

ഒരു വർഷത്തെ തോരാത്ത കണ്ണീരിനൊടുവിൽ ചെറിയൊരാശ്വാസമാകും ഈ കുഞ്ഞിന്റെ വരവ്...
കഴിഞ്ഞ ആഴ്ച കണ്ണൂരിൽ അലിഡ ഗുവേര പങ്കെടുത്ത ചടങ്ങിൽ അഭിയുടെ അമ്മയുമുണ്ടായിരുന്നു. പ്രമുഖ സദസിന് മുന്നിൽ വച്ച് അലിഡ ആ അമ്മയെ ആദരിച്ചപ്പോഴും " നാൻ പെറ്റ മകനെ... എൻ കിളിയെ..." എന്ന ദീനരോദനം വേദിയേയും സദസിനേയും കണ്ണീരിൽ കുതിർത്തു...

തോരാത്ത കണ്ണീരിന് ആശ്വസമേകാൻ കഴിയട്ടെയെൻ പൊൻതങ്കക്കുടത്തിന്....