കൊയിലാണ്ടിക്ക് സമീപം വാഹനാപകടം: ദമ്പതികള്‍ മരിച്ചു

കൊയിലാണ്ടി: നന്തി ടോള്‍ ബൂത്തിന് സമീപമുണ്ടായ വാഹനാപകടത്തില്‍ ദമ്പതികള്‍ മരിച്ചു. നന്തി സ്വദേശി ബഷീര്‍ (54), ഭാര്യ ജമീല (47) എന്നിവരാണ് മരിച്ചത്. മകന്‍ മുഹമ്മദ് അഭിയും കൂടെയുണ്ടായിരുന്നു. അഭിയെ പരിക്കുകളോടെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ബുധനാഴ്ച പുലര്‍ച്ചെ ആയിരുന്നു അപകടം.

ബഷീറിന്റെ മാതാവ് മരിച്ച വിവരം അറിഞ്ഞ് കണ്ണൂര്‍ ഉള്ളൂര്‍ക്കടവില്‍ നിന്നും നന്തിയിലെ ഒറ്റതെങ്ങിലുള്ള വീട്ടിലേക്ക് വരുന്ന വഴിയാണ് ഇവര്‍ അപകടത്തില്‍പ്പെട്ടത്.

ഇവര്‍ സഞ്ചരിച്ച കാറിന് പിന്നില്‍ ലോറി ഇടിച്ചതിനെത്തുടര്‍ന്ന് കാര്‍ മറ്റൊരു ലോറിക്ക് പിന്നില്‍ ഇടിച്ചുകയറിയാണ് അപകടമുണ്ടായത്.