തെറ്റായ റിപ്പോർട്ട് നൽകി: സർക്കാർ ഉദ്യോഗസ്ഥർക്കെതിരെ നടപടി

തിരുവനന്തപുരം: തെറ്റായ വിവരം നൽകി സർക്കാരിനെ തെറ്റിദ്ധരിപ്പിക്കാൻ ശ്രമിച്ച ഉദ്യോഗസ്ഥർക്കെതിരെ കടുത്ത നടപടി. മലപ്പുറം തൃക്കലങ്ങോട് പഞ്ചായത്തിൽ മണ്ണിടിച്ചിൽ ഉണ്ടായ സ്ഥലത്ത് കേടുപാടുകൾ സംഭവിക്കാത്ത വീടുകൾക്ക് കേട് സംഭവിച്ചുവെന്ന് റിപ്പോർട്ട് നൽകിയ ഉദ്യോഗസ്ഥർക്കെതിരെയാണ് നടപടി സ്വീകരിച്ചിരിക്കുന്നത്.

കേട് സംഭവിക്കാത്ത വീടിന് കേട് സംഭവിച്ചുവെന്നും സംരക്ഷണ ഭിത്തി ആവശ്യമാണെന്നും അസി. എൻജിനീയർ കെ.ടി.അലി ഫൈസൽ,ഓവർസിയർ എ.സതീഷ് എന്നിവർ സർട്ടിഫിക്കറ്റ് നൽകി. ദിവസവേതന അടിസ്ഥാനത്തിൽ ജോലി ചെയ്യുന്നയാളാണ് സതീഷ്. സർക്കാർ നിർദേശങ്ങൾക്ക് വിരുദ്ധമായി ഇവർ അപേക്ഷകരെ സഹായിച്ചുവെന്നാണ് പരാതി. ഇത് സംബന്ധിച്ച് ഇരുവർക്കുമെതിരെ ചീഫ് എൻജിനീയർ റിപ്പോർട്ട് സമർപ്പിച്ചിരുന്നു.കെ.ടി.അലി ഫൈസലിനെ അന്വേഷണ വിധേയമായി സസ്‌പെൻഡ് ചെയ്യും. എ.സതീഷിനെ ജോലിയിൽ നിന്ന് പിരിച്ചുവിടാനുമാണ് തദ്ദേശ സ്വയംഭരണ വകുപ്പ് മന്ത്രി എ.സി.മൊയ്‌തീൻ നിർദേശിച്ചിരിക്കുന്നത്.