ലൈംഗികാരോപണം: പി കെ ശശിയ്ക്കെതിരെ നടപടി ഉറപ്പായി

തിരുവനന്തപുരം: ലൈംഗികാരോപണം നേരിടുന്ന ഷൊര്‍ണൂര്‍ എംഎൽഎ പി കെ ശശിയ്ക്കെതിരെ നാളെ നടക്കുന്ന സിപിഎം സെക്രട്ടറിയേറ്റ് യോഗത്തിൽ നടപടിയുണ്ടായേക്കും. പാര്‍ട്ടി നിയോഗിച്ച രണ്ടംഗ അന്വേഷണ കമ്മീഷൻ അന്വേഷണ റിപ്പോര്‍ട്ട് നാളെ യോഗത്തിൽ സമര്‍പ്പിക്കും.

അതേസമയം, വിഷയത്തിൽ ഗൂഢാലോചനയുണ്ടെന്ന പി കെ ശശിയുടെ പരാതിയിലും നടപടിയുണ്ടായേക്കുമെന്നാണ് റിപ്പോര്‍ട്ട്.

ഡിവൈഎഫ്ഐ പാലക്കാട് ജില്ലാക്കമ്മിറ്റിയിലെ അംഗമായ യുവതിയാണ് പി കെ ശശിയ്ക്കെതിരെ പാര്‍ട്ടിയിൽ പരാതി നല്‍കിയത്. പാര്‍ട്ടി സെക്രട്ടറിയേറ്റ് അംഗങ്ങളായ പി കെ ശ്രീമതിയും എ കെ ബാലനുമാണ് പരാതി അന്വേഷിച്ചത്.

പരാതിക്കാരിയിൽ നിന്നും പി കെ ശശിയിൽ നിന്നും രണ്ട് തവണ വീതം കമ്മീഷൻ മൊഴിയെടുത്തിരുന്നു. ശനിയാഴ്ച നടക്കുന്ന സിപിഎം സംസ്ഥാന കമ്മിറ്റിയിലാകും ശശിയ്ക്കെതിരെ നടപടി തീരുമാനിക്കുക.