ദിലീപിന്‍റെ ജാമ്യാപേക്ഷയില്‍ വിധി തിങ്കളാഴ്‍ച്ച

കൊച്ചി: നടിയെ ആക്രമിച്ച കേസിൽ ജയിലിൽ കഴിയുന്ന നടൻ ദിലീപിന് അങ്കമാലി മജിസ്ട്രേറ്റ് കോടതി ജാമ്യം അനുവദിക്കുന്നത് തിങ്കളാഴ്‍ച്ച അറിയാം . അടച്ചിട്ട മുറിയിലാണ് ജാമ്യാപേക്ഷയില്‍ വാദം നടന്നത്. വാദം പൂര്‍ത്തിയായി. ദിലീപിന്‍റെ റിമാന്‍ഡ് ഈ മാസം 28വരെ നീട്ടിയിട്ടുണ്ടെന്നും മാധ്യമങ്ങള്‍ റിപ്പോര്‍ട്ട് ചെയ്‍തു.

60 ദിവസത്തിന് മേൽ തടവിൽ കഴിഞ്ഞതിനാല്‍ സ്വാഭാവിക ജാമ്യത്തിന് അര്‍ഹതയുണ്ടെന്ന് ദിലീപിന്‍റെ അഭിഭാഷകന്‍ വാദിച്ചു. നാലാം തവണയാണ് ദിലീപ് ജാമ്യാപേക്ഷ സമർപ്പിക്കുന്നത്. നേരത്തെ ദിലീപിന്‍റെ ജാമ്യാപേക്ഷ രണ്ടു തവണ ഹൈക്കോടതിയും ഒരു തവണ അങ്കമാലി മജിസ്‌ട്രേറ്റ് കോടതിയും തള്ളിയിരുന്നു.

യുവ നടിയുടെ നഗ്ന ചിത്രങ്ങൾ പകർത്താന്‍ ക്വട്ടേഷന്‍ നല്‍കുകയും ഇതിനായി ഗൂഢാലോചന നടത്തിയെന്നുമാണ് കേസ്. ഒന്നാം പ്രതി സുനില്‍ കുമാര്‍ ദിലീപിന് കുറ്റകൃത്യത്തില്‍ പങ്കുണ്ടെന്ന് സമ്മതിച്ചിട്ടുണ്ട്.

കേസ് അന്വേഷണം നീളുന്നതിനെ കഴിഞ്ഞദിവസം ഹൈക്കോടതി വിമര്‍ശിച്ചിരുന്നു. രണ്ടാഴ്‍ച്ചയ്ക്കുള്ളില്‍ അന്വേഷണം പൂര്‍ത്തിയാകുമെന്നാണ് പോലീസ് കോടതിയെ ധരിപ്പിച്ചത്.

ദിലീപിന്‍റെ സുഹൃത്തും സംവിധായകനുമായ നാദിര്‍ഷാ, ദിലീപിന്‍റെ ഭാര്യയും നടിയുമായ കാവ്യാ മാധവന്‍ എന്നിവരും പോലീസ് അന്വേഷണത്തിന്‍റെ പരിധിയിലാണ്. മുന്‍കൂര്‍ ജാമ്യംതേടി കാവ്യാ മാധവന്‍ ശനിയാഴ്ച്ച ഹൈക്കോടതിയെ സമീപിച്ചിരുന്നു.

Dileep Bail plea; court to verdict on Monday

Angamaly magistrate court to pronounce the Judgement of Actor Dileep's bail application in actress abduction case on Monday.