ആലുവ: ജാമ്യവ്യവസ്ഥയിൽ ഇളവ് തേടി നടൻ ദിലീപ് ഹൈക്കോടതിയിൽ ഹർജി നൽകി. നടിയെ ആക്രമിക്കപ്പെട്ട കേസിൽ ജയിലിൽ ആയിരുന്ന ദിലീപിന് കടുത്ത ഉപാധികളോടെ ആയിരുന്നു ജാമ്യം അനുവദിച്ചിരുന്നത്.
ഈ സാഹചര്യത്തിലാണ് ജാമ്യവ്യവസ്ഥയിൽ ഇളവ് തേടി ദിലീപ് കോടതിയെ സമീപിച്ചിരിക്കുന്നത്.
ദുബായിൽ 'ദേ പുട്ടി'ൻ്റെ ഉദ്ഘാടനത്തിന് പോകാനാണ് ഇളവ് തേടിയിരിക്കുന്നത്. ഉദ്ഘാടനത്തിൽ പങ്കെടുക്കാൻ അനുവദിക്കണമെന്നും പാസ്പോർട്ട് തിരികെ നൽകണമെന്നും ആവശ്യപ്പെട്ടാണ് ഹർജി സമർപ്പിച്ചിരിക്കുന്നത്.
നടി ആക്രമിക്കപ്പെട്ട കേസുമായി ബന്ധപ്പെട്ട് ജയിലിൽ അടയ്ക്കപ്പെട്ട ദിലീപിന് 85 ദിവസത്തെ ജയിൽവാസത്തിനു ശേഷം ആയിരുന്നു ജാമ്യം അനുവദിച്ചത്. കേരളം വിട്ടു പോകരുതെന്നും പാസ്പോർട്ട് അങ്കമാലി കോടതിയിൽ സമർപ്പിക്കണമെന്നും ജാമ്യം അനുവദിച്ചപ്പോൾ കോടതി ദിലീപിനോട് ആവശ്യപ്പെട്ടിരുന്നു.