പാർട്ടി വോട്ടുകൾ ലഭിച്ചില്ല; വിജയ സാധ്യത നേതൃത്വം ഉപയോഗിച്ചില്ല; ബിജെപി ജില്ലാ നേതൃത്വത്തിനെതിരെ കൃഷ്ണകുമാര്‍

മണ്ഡലത്തിൽ തികഞ്ഞ വിജയപ്രതീക്ഷയിലായിരുന്ന കൃഷ്ണകുമാറിന് മൂന്നാം സ്ഥാനത്തെത്താനെ കഴിഞ്ഞിരുന്നുള്ളൂ. കോൺഗ്രസിന്‍റെ സിറ്റിങ് സീറ്റിൽ നിലവിലെ എംഎൽഎയെ വീഴ്ത്തി എൽഡിഎഫിലെ ആന്‍റണി രാജുവാണ് വിജയിച്ചത്. ആന്‍റണി രാജുവിന് 48748 വോട്ടുകൾ ലഭിച്ചപ്പോൾ, കോൺഗ്രസ് നേതാവ് വിഎസ് ശിവകുമാറിന് ലഭിച്ചത് 41,659 വോട്ടുകൾ. കൃഷ്ണകുമാറിന്‍റെ പിന്തുണ 34,996 വോട്ടിലൊതുങ്ങി.

മണ്ഡലത്തിലെ പരാജയത്തെക്കുറിച്ച് മാതൃഭൂമി ന്യൂസിനോട് സംസാരിക്കവെയാണ് കൃഷ്ണകുമാർ നേതൃത്വത്തിനെതിരെ വിമർശനങ്ങൾ ഉന്നയിച്ചത്. കേന്ദ്ര നേതാക്കള്‍ മണ്ഡലത്തിലേക്ക് എത്താത്തിന്‍റെ കാരണം ജില്ലാ നേതൃത്വത്തിന്‍റെ വീഴ്ചയാണെന്നാണ് അദ്ദേഹം പറയുന്നത്. സര്‍വ്വേ ഫലങ്ങള്‍ തനിക്ക് വിജയസാധ്യത പ്രവചിച്ചപ്പോള്‍ കുറച്ചുകൂടി ഉണര്‍ന്ന് പ്രവര്‍ത്തിക്കണമായിരുന്നെന്നും ചലച്ചിത്ര താരം കൂടിയായ കൃഷ്ണകുമാർ പറയുന്നു.

പാർട്ടി വോട്ടുകൾ തനിക്ക് ലഭിച്ചില്ലെന്ന വിമർശനമാണ് കൃഷ്ണകുമാർ ഉയർത്തുന്നത്. ഒരു കലാകാരന്‍ ആയതുകൊണ്ടുതന്നെ വ്യക്തിപരമായ വോട്ടുകള്‍ ധാരാളം ഉണ്ടാകും. അതിന്റെ കൂടെ പാര്‍ട്ടി വോട്ടുകള്‍ കൂടെ ഉണ്ടായിരുന്നെങ്കില്‍ വിജയ സാധ്യത ഉറപ്പായിരുന്നു. 2019മായി താരതമ്യം ചെയ്യുമ്പോള്‍ വോട്ടുകള്‍ കുറഞ്ഞെന്നും അദ്ദേഹം പറഞ്ഞതായി മാതൃഭൂമി റിപ്പോർട്ട് ചെയ്യുന്നു. പാര്‍ട്ടി അവസരം തന്നാല്‍ ഇനിയും ഇതേ മണ്ഡലത്തില്‍ തന്നെ മത്സരിക്കുമെന്നും ബിജെപി നേതാവ് പറഞ്ഞു.

തന്‍റെ തെരഞ്ഞെടുപ്പ് പ്രചാരണത്തിന് കേന്ദ്ര നേതാക്കൾ ആരും എത്താതും തോൽവിയ്ക്ക് കാരണമായി കൃഷ്ണകുമാർ ഉയർത്തിക്കാട്ടുന്നുണ്ട്. തന്‍റെ മണ്ഡലത്തിലാണ് എയർപോർട്ട്. ദേശീയ നേതാക്കന്‍മാര്‍ എല്ലാവരും ഈ എയര്‍പോര്‍ട്ടിലൂടെയാണ് വരുന്നതും പോകുന്നതും. എന്നിട്ടും തന്‍റെ മണ്ഡലത്തില്‍ ആരും പ്രചാരണത്തിന് വന്നില്ലെന്നും അദ്ദേഹം ആരോപിച്ചു. സമീപ മണ്ഡലങ്ങളിൽ ദേശീയ നേതാക്കൾ പ്രചാരണത്തിനെത്തിയിരുന്നെന്നും അദ്ദേഹം ചൂണ്ടിക്കാട്ടിയതായി റിപ്പോർട്ട് പറയുന്നു.