നടന്‍ കുഞ്ഞുമുഹമ്മദ് അന്തരിച്ചു

കൊടുങ്ങല്ലൂർ: നടനും സംവിധാന സഹായിയുമായിരുന്ന കുഞ്ഞുമുഹമ്മദ്(68) കുഴഞ്ഞുവീണ് മരിച്ചു. സത്യന്‍ അന്തിക്കാടിന്‍റെ പുതിയ സിനിമയായ ഞാൻ പ്രകാശന്‍റെ സെറ്റില്‍ വച്ചായിരുന്നു ഇദ്ദേഹം കുഴഞ്ഞു വീണത്. പിന്നീട് ആശുപത്രിയിലെത്തിച്ചെങ്കിലും ഉടൻ മരണം സംഭവിക്കുകയായിരുന്നു.

നൂറോളം ചിത്രങ്ങളില്‍ വേഷമിട്ടിട്ടുള്ള കുഞ്ഞു മുഹമ്മദ് ഇണപ്രാവുകള്‍ എന്ന ചിത്രത്തില്‍ പ്രൊഡക്ഷന്‍ ബോയി ആയിട്ടാണ് ചലച്ചിത്ര ലോകത്തേക്കെത്തിയത്. കമല്‍ സംവിധാനം ചെയ്ത പ്രാദേശിക വാര്‍ത്തകളില്‍ കുഞ്ഞുമുഹമ്മദ് ചെറിയ വേഷത്തില്‍ അഭിനയിച്ചിരുന്നു. പിന്നീട് കമലിന്റെ സിനിമകളിലെ സജീവ സാന്നിധ്യമാകുകയായിരുന്നു.

.മലയാളത്തിലെ യുവസംവിധായകരായ അക്കു അക്ബര്‍, ആഷിക് അബു, ജനൂസ് മുഹമ്മദ് എന്നിവരുടെ സിനിമകളിലും കുഞ്ഞുമുഹമ്മദ് അഭിനയിച്ചിട്ടുണ്ട്. അവസാനമായി അഭിനയിച്ച ഞാൻ പ്രകാശനിൽ ഫഹദ് ഫാസിലിനൊപ്പമായിരുന്നു അഭിനയിച്ചിരുന്നത്.