നടിയെ തട്ടിക്കൊണ്ടുപോയതിന് പിന്നിൽ പ്രമുഖ നടനും രാഷ്ട്രീയനേതാവിന്റെ മക്കളെന്നും റിപ്പോർട്ട്

ന്യൂഡൽഹി: യുവനടിയെ തട്ടിക്കൊണ്ടുപോയി അക്രമിച്ച സംഭവത്തിന് പിന്നിൽ മലയാളത്തിലെ പ്രമുഖ നടനും ഒരു രാഷ്ട്രീയനേതാവിന്റെ രണ്ട് മക്കള്‍ക്കും ബന്ധമുണ്ടെന്ന് ദേശീയ മാധ്യമം റിപ്പോർട്ട് ചെയ്തു.മുംബൈ പത്രമായ ഡിഎന്‍എയാണ് റിപ്പോർട്ട് ചെയ്തത്.

ഇടതുപക്ഷത്തെ പ്രമുഖ രാഷ്ട്രീയപാര്‍ട്ടിയുടെ നേതാവിന്റെ മക്കളാണ് ആരോപണ വിധേയരെന്നാണ് ഡിഎൻഎയുടെ റിപ്പോർട്ടിൽ പറയുന്നത്. ഇവര്‍ക്ക് പ്രതിസ്ഥാനത്തുള്ള ഗുണ്ടാസംഘങ്ങളുമായി ബന്ധമുണ്ടെന്നുള്ളതിന്റെ വ്യക്തമായ സൂചനകള്‍ പൊലീസിന് ലഭിച്ചതായും ഡിഎന്‍എ വെളിപ്പെടുത്തുന്നു.

രാഷ്ട്രീയനേതാവിന്റെ മക്കള്‍ കഴിഞ്ഞ തീയേറ്റര്‍ സമരകാലത്താണ് സിനിമാമേഖലയുമായി അടുത്തുബന്ധപ്പെടുന്നത്. തങ്ങളുടെ രാഷ്ട്രീയ സ്വാധീനം ഉപയോഗിച്ച് തിയേറ്റര്‍ ഉടമകളുടെ സമരപ്രശ്‌നം പരിഹരിക്കാന്‍ ഇടപെട്ട ഇവര്‍ സിനിമാ മേഖലയില്‍ സ്വാധീനം ഉറപ്പിക്കുകയായിരുന്നു.

സംഭവത്തില്‍ ആരോപണ വിധേയനായ പ്രമുഖ നടനുമൊത്ത് സിനിമാ നിര്‍മാണ സംരംഭം ആരംഭിക്കാനുള്ള ശ്രമത്തിലാണ് ഇവര്‍. ഇതിനുള്ള ചര്‍ച്ചകള്‍ പുരോഗമിക്കുകയാണെന്നും ഡിഎന്‍എ റിപ്പോര്‍ട്ട് ചെയ്തു.

ആക്രമിക്കപ്പെട്ട നടിയ്ക്ക് പ്രമുഖ നടനും ഭാര്യയുമായി അടുത്ത ബന്ധമാണ് ഉണ്ടായിരുന്നത്. എന്നാൽ ഇവരുടെ വിവാഹമോചനവുമായി ബന്ധപ്പെട്ട തര്‍ക്കത്തില്‍ ഭാര്യയ്ക്കൊപ്പം നടി നിന്നതിനെ തുടർന്ന് നടൻ പ്രതികാരവുമായി തിരിഞ്ഞു. നടിയ്ക്ക് മലയാള സിനിമയിലെ അവസരങ്ങള്‍ നഷ്ടപ്പെടാനുണ്ടായ കാരണം നടനാണെന്നും പത്രം റിപ്പോര്‍ട്ട് ചെയ്യുന്നു.

കഴിഞ്ഞ വെള്ളിയാഴ്ച രാത്രിയാണ് സിനിമാ ഷൂട്ടിംഗിന് ശേഷം തൃശൂരില്‍ നിന്നും മടങ്ങിവരവെ കൊച്ചിയില്‍ വെച്ച് ആക്രമിക്കപ്പെട്ടത്. സംഭവത്തിൽ ഇതുവരെ നാല് പേർ പിടിയിലായി.

Actor, politician's sons behind the Malayalam actress kidnapping reports DNA.