ദിലീപിന്‍റെ ജാമ്യത്തിന് ശേഷം അന്വേഷണം ഇഴയുന്നെന്ന് ആക്ഷേപം

കൊച്ചി: കൊച്ചിയിൽ നടിയെ ആക്രമിച്ച കേസില്‍ ദിലീപിന് ജാമ്യം കിട്ടിയതിന് ശേഷം അന്വേഷണം ഇഴയുന്നെന്ന് പരക്കെ ആക്ഷേപം കേസുമായി ബന്ധപ്പെട്ട കുറ്റപത്രം സമര്‍പ്പിക്കാനും കാലതാമസം നേരിടുകയാണ്. അന്വേഷണത്തിന്‍റെ മെല്ലെപ്പോക്ക് ജയിലിലുള്ള പ്രതികള്‍ക്ക് ഗുണകരമാകുമെന്നും വിദഗ്ധര്‍ വിലയിരുത്തുന്നു.

കേസില്‍ അറസ്റ്റിലായ ദിലീപ് ജാമ്യം കിട്ടി ജലിയിന് പുറത്തിറങ്ങുന്നതിന് മുന്‍പ് തന്നെ കുറ്റപത്രം സമര്‍പ്പിക്കാൻ അന്വേഷണ സംഘം ശ്രമിച്ചിരുന്നെങ്കിലും അത് നടന്നിരുന്നില്ല. എന്നാല്‍ 85 ദിവസം ജയിലില്‍ കഴിഞ്ഞ ദിലീപ് പുറത്തിറങ്ങി രണ്ടാഴ്ച്ചക്ക് ശേഷവും കുറ്റപത്രം സമര്‍പ്പിക്കാൻ അന്വേഷണസംഘത്തിന് കഴിഞ്ഞിട്ടില്ല എന്നതാണ് ആക്ഷേപത്തിന് വഴി വെക്കുന്നത്. കുറ്റപത്രം പഴുതടച്ചതാവണമെന്ന നിര്‍ബന്ധം അന്വേഷണ സംഘത്തിനുണ്ട്. അത്തരത്തിൽ കുറ്റപത്രം സമര്‍പ്പിക്കാനുള്ള ശ്രമത്തിലാണ് അന്വേഷണ സംഘമെന്നുമാണ് ഡിജിപി നല്‍കിയ വിശദീകരണം.

കുറ്റപത്രം തയ്യാറാക്കൽ അന്തിമ ഘട്ടത്തിലെത്തിയെന്നാണ് അറിയാൻ കഴിയുന്നത്. ദൃശ്യങ്ങള്‍ പകര്‍ത്തിയ മൊബൈല്‍ ഫോണും ഇതുവരെ കണ്ടെത്താനാകാത്തത് അന്വേഷണസംഘത്തെ വലയ്ക്കുന്നുണ്ട്. ഇതിനായുള്ള തീവ്രശ്രമം അക്ഷീണം പുരോഗമിക്കുകയാണെന്നും പോലീസ് വാദിക്കുന്നു.

ഇതിനിടെ സോളാര്‍ കേസില്‍ ആരോപണം നേരിട്ട എസ് പി സുദര്‍ശനെ സ്ഥലം മാറ്റിയത് അന്വേഷണ സംഘത്തെ സാരമായി ബാധിച്ചിട്ടുണ്ട്. സുദര്‍ശന് പകരം ആളെത്തിയാല്‍ ഇതുവരെയുള്ള കാര്യങ്ങള്‍ ആദ്യം മുതൽ പഠിക്കേണ്ടി വരുമെന്നതിനാൽ കുറ്റപത്രസമര്‍പ്പണത്തിന് വീണ്ടും കാലതാമസമുണ്ടാകാൻ സാധ്യതയുണ്ട്.

Actress Attack Case Diary submission delaying

Case Diary submission delaying regarding Actress Attack Case Investigation