കൊച്ചി: നടി ആക്രമിക്കപ്പെട്ട കേസിൽ നടൻ ദിലീപിൻ്റെ പങ്ക് ആദ്യം സംശയിച്ചത് നടിയുടെ സഹോദരൻ എന്ന്. കുറ്റപത്രത്തിലാണ് ഇക്കാര്യങ്ങൾ ഉള്ളത്. നടി ആക്രമിക്കപ്പെട്ട കേസിൽ ബുധനാഴ്ച ആയിരുന്നു പൊലീസ് കുറ്റപത്രം സമർപ്പിച്ചത്. കുറ്റപത്രത്തിലെ കൂടുതൽ വിവരങ്ങളാണ് ഇപ്പോൾ പുറത്തു വന്നിരിക്കുന്നത്.
നടി ആക്രമിക്കപ്പെട്ടതിൽ ദിലീപിന് പങ്കുണ്ടെന്ന് ആദ്യം സംശയിച്ചത് നടിയുടെ സഹോദരൻ ആണെന്ന് കുറ്റപത്രത്തിൽ പറയുന്നു. അന്വോഷണസംഘത്തിന് നടിയുടെ സഹോദരൻ നൽകിയ മൊഴിയിലാണ് ഇക്കാര്യങ്ങൾ ഉള്ളത്. കൃത്യത്തിൽ ദിലീപിന് പങ്കുണ്ടെന്ന് തനിക്ക് ബോധ്യമുണ്ടെന്ന് ആയിരുന്നു സഹോദരൻ്റെ മൊഴി.
അതിനുശേഷം, കേസിലെ മുഖ്യപ്രതിയായ പൾസർ സുനി എന്ന സുനിൽകുമാർ ജയിലിൽ നിന്നും ദിലീപിന് കത്ത് അയച്ചുവെന്ന വിവരം പുറത്തുവന്നു. ഇതോടെ, സംശയം ബലപ്പെട്ടു. ഇക്കാര്യം, സഹോദരൻ അന്വേഷണസംഘത്തോട് പറഞ്ഞെന്നും കുറ്റപത്രത്തിൽ പറയുന്നു.
കൂടാതെ, നടിയെ ദിലീപ് ഭീഷണിപ്പെടുത്തിയ വിവരവും കുറ്റപത്രത്തിലുണ്ട്. താരസംഘടനയായ അമ്മയുടെ സ്റ്റേജ് ഷോയ്ക്ക് മുമ്പായുള്ള റിഹേഴ്സലിന് ഇടയിലായിരുന്നു സംഭവം. കൂടാതെ, ഇതിനു പിന്നാലെ നടൻ സിദ്ദിഖും നടിയെ വിളിച്ച് താക്കീത് ചെയ്തിരുന്നുവെന്നും കുറ്റപത്രത്തിൽ പറയുന്നു.