ബത്തേരിയിൽ കടുവയുടെ ആക്രമണം; ഒരാൾ മരിച്ചു

ബത്തേരി: വയനാട് ബത്തേരിയിൽ കടുവയുടെ ആക്രമണത്തിൽ ഒരാൾ മരിച്ചു. പച്ചാടി ആദിവാസി കോളനിയിലെ ജഡയനാണ് മരിച്ചത്. വടക്കനാട് വനത്തിനുള്ളിൽ വിറക് ശേഖരിക്കാൻ പോയ വൃദ്ധനാണ് കൊല്ലപ്പെട്ടത്. ഇന്നലെ രാത്രിയായിരുന്നു സംഭവം.

ഇന്നലെ ഉച്ചയ്ക്കായിരുന്നു ജഡയൻ വിറക് ശേഖരിക്കാൻ പച്ചാടി വനത്തിലേക്ക് പോയത്. രാത്രി വൈകിയിട്ടും തിരിച്ചെത്താത്തതിനെ തുടർന്ന് നടത്തിയ അന്വേഷണത്തിനൊടുവിലാണ് മൃതദേഹം കണ്ടെത്തിയത്. ഇന്ന് രാവിലെ പുൽപ്പള്ളി പച്ചാടി റോഡിൽ വനത്തിനുള്ളിൽ നിന്നാണ് മൃതശരീരം കണ്ടെത്തുന്നതെന്നാണ് റിപ്പോർട്ട്.

Also Read: കർണാടകയിൽ സിപിഐ സംസ്ഥാന കമ്മിറ്റി ഓഫീസിന് തീ വെച്ചു; വാഹനങ്ങളും കത്തിനശിച്ചു


തലയില്ലാത്ത നിലയിലാണ് മൃതദേഹം കണ്ടെത്തിയത്. സ്ഥലത്തെത്തിയ വനംവകുപ്പ് ഉദ്യോഗസ്ഥർക്കെതിരെ നാട്ടുകാർ പ്രതിഷേധിച്ചു. ജഡായുവിന്‍റെ കുടുംബത്തിന് നഷ്ടപരിഹാരം ആവശ്യപ്പെട്ടായിരുന്നു പ്രതിഷേധം. ഒരാൾക്ക് ജോലി നൽകണമെന്നും നാട്ടുകാർ ആവശ്യപ്പെട്ടു. ജനപ്രതിനിധികളും സ്ഥലത്തെത്തിയിരുന്നു.

കുടുംബത്തിന് 10 ലക്ഷം രൂപ നഷ്ടപരിഹാരം നൽകുമെന്നും കുടുംബാംഗത്തിന് ജോലിയും ഉടൻ തന്നെ നൽകുമെന്നും ഐസി ബാലകൃഷ്ണൻ പറഞ്ഞു. ജോലിയുടെ കാര്യം ഡിഎഫ്ഒയ്ക്ക് തന്നെ തീരുമാനിച്ച് നടപ്പാക്കാൻ കഴിയുമെന്നും അദ്ദേഹം പറഞ്ഞു. സ്ഥലത്ത് മൂന്നാമത്തെയാളാണ് കടുവയുടെ ആക്രമണത്തിൽ കൊല്ലപ്പെടുന്നതെന്ന് നാട്ടുകാർ പറഞ്ഞു.