സംസ്ഥാനത്ത് ഭരണസ്തംഭനമെന്ന് രമേശ് ചെന്നിത്തല

തിരുവനന്തപുരം: സംസ്ഥാനത്ത് പൂര്‍ണമായും ഭരണം സ്തംഭിച്ചെന്ന് പ്രതിപക്ഷ നേതാവ് രമേശ് ചെന്നിത്തല. മുഖ്യമന്ത്രി വിദേശത്ത് ചികിത്സയ്ക്ക് പോയതോടെ സംസ്ഥാനത്തെ ഭരണം പൂര്‍ണമായും നിലച്ചിരിക്കുകയാണ്. ഒരു മന്ത്രിസഭായോഗം പോലും ചേരാന്‍ സാധിച്ചിച്ചിട്ടില്ല. മുഖ്യമന്ത്രിയും സിപിഎമ്മും ചേര്‍ന്ന് സംസ്ഥാനത്തെ അനാഥമാക്കിയെന്നും ചെന്നിത്തല ആരോപിച്ചു.

തമിഴ്നാട്ടില്‍ ജയലളിത ആശുപത്രിയിലായിരുന്നപ്പോഴുണ്ടായ ഗുരുതരമായ അവസ്ഥയ്ക്ക് സമാനമാണ് കേരളത്തിലെ സാഹചര്യമെന്ന് ചെന്നിത്തല പറഞ്ഞു. മന്ത്രിസഭാ യോഗം ചേരാത്തത് കേരളത്തിലെ ജനങ്ങളോട് സര്‍ക്കാരിന് യാതൊരു ഉത്തരവാദിത്തവും ഇല്ലെന്നതിന്‍റെ തെളിവാണ്. മന്ത്രിസഭാ ഉപസമിതി കൈക്കൊള്ളുന്ന തീരുമാനങ്ങള്‍ നിയമപരമായി നിലനില്‍ക്കുന്നതല്ല. ക്യാബിനറ്റ് എടുക്കേണ്ട തീരുമാനങ്ങള്‍ ക്യാബിനറ്റ് തന്നെ എടുക്കണമെന്നും ചെന്നിത്തല ചൂണ്ടിക്കാട്ടി.