ഐ എസ് ബന്ധം: വയനാട് സ്വദേശി ഡൽഹിയിൽ അറസ്റ്റിൽ

ന്യൂഡൽഹി: ഭീകര സംഘടനയായ ഇസ്‍ലാമിക് സ്റ്റേറ്റുമായുളള (ഐ എസ്) ബന്ധത്തെ തുടര്‍ന്ന് വയനാട് സ്വദേശി ഡല്‍ഹിയില്‍ അറസ്റ്റില്‍. വയനാട് കല്പറ്റ മുണ്ടേരി കരിക്കാടൻ പൊയിൽ വീട്ടിൽ നഷീദുൾ ഹംസഫറിനെ(26)യാണ് ദേശീയ അന്വേഷണ ഏജൻസി (എൻ ഐ എ ) അറസ്റ്റുചെയ്തത്.

കാസർകോട്ടുനിന്ന് കാണാതായ അബ്ദുൾ റഷീദ് അബ്ദുള്ള, അഷ്‌ഫാഖ് മജീദ് എന്നിവർക്കൊപ്പം സാമൂഹിക മാധ്യമങ്ങളിലൂടെ ഐ എസ് ആശയങ്ങൾ പ്രചരിപ്പിച്ചെന്നതാണ് ഇയാൾക്കെതിരെയുളള കേസ്. കാബൂളിൽനിന്ന് ബുധനാഴ്ച ഡൽഹിയിലെത്തിയ ഉടൻ ഇയാളെ അറസ്റ്റുചെയ്യുകയായിരുന്നെന്ന് എൻ ഐ എ വക്താവ് പ്രസ്താവനയിൽ അറിയിച്ചു.

ഐ എസിൽ ചേരാനായി കാസർകോട്ടുകാരായ 14 സുഹൃത്തുക്കൾക്കൊപ്പം കഴിഞ്ഞവർഷമാണ് ഇയാൾ അഫ്ഗാനിലെത്തിയത്. ഇതിൽ ചിലർ ഗൾഫ് രാജ്യങ്ങളിൽ 2016 മുതൽ ജോലിനോക്കിയിരുന്നവരാണ്. 2017 ഒക്ടോബർ മൂന്നിന് ഇന്ത്യവിട്ട നഷീദുൾ ആദ്യം മസ്കറ്റ് വഴി ഒമാനിലേക്കാണ് പോയത്. അവിടെനിന്ന് ഇറാൻവഴി കാബൂളിലെത്തി. അവിടെവെച്ച് കഴിഞ്ഞവർഷം അഫ്ഗാൻ സുരക്ഷാ സേനയുടെ പിടിയിലാവുകയായിരുന്നു.

ബുധനാഴ്ച ഡൽഹി എൻ ഐ എ കോടതിയിൽ ഹാജരാക്കിയ നഷീദുളിനെ ഉടൻ കൊച്ചിയിലെ എൻ ഐ എ പ്രത്യേക കോടതിയിൽ ഹാജരാക്കും.