കള്ളന്മാരെ കുടുക്കിയ തത്തമ്മ താരമായി

കൊച്ചി: ഒരു തത്തയെ മോഷ്ടിച്ചാൽ ഇങ്ങനെ പൊല്ലാപ്പാവുമെന്ന് ആരും കരുതികാണില്ല. കഴിഞ്ഞദിവസം എറണാകുളം കലൂർ മാർക്കറ്റിലാണ് സംഭവമുണ്ടായത്. മാർക്കറ്റിൽ വളർത്തുമൃഗങ്ങളെ വിൽക്കുന്ന കടയിൽ നിന്ന് ആഫ്രിക്കൻ തത്തയെ മോഷ്ടിച്ചവരാണ് കുടുങ്ങിയത്. എളമക്കര സ്വദേശികളാണ്കടയിൽ നിന്ന് വിലകൂടിയ ആഫ്രിക്കൻ ഗ്രേ തത്തകളേയും പേര്‍ഷ്യൻ പൂച്ചയേയും കോക്ടീൽ പക്ഷികളേയും മോഷ്ടിച്ചത്. ഇവരുടെ വീട്ടിലെത്തിച്ച തത്ത ഇടയ്ക്കിടെ തന്‍റെ സ്വന്തം ഉടമയുടെ പേര് ഇടയ്ക്കിടെ വിളിച്ചു പറഞ്ഞത് മൂലമാണ് ഇവർ കുടുങ്ങിയത്. ഇതു കേട്ട അയൽവാസികളാണ് പോലീസിൽ വിവരം നൽകിയത്.

ഒരു തത്തയ്ക്ക് 60,000 രൂപയാണ് വില, പേർഷ്യൻ പൂച്ചയ്ക്ക് 12,000 രൂപയും കൊക്ടീലിന് 2000 രൂപയുമാണ് വില. എളമക്കര സ്വദേശികളായ സിറാജ്(38), അനിൽ കുമാർ(53), ബാലകൃഷ്ണൻ(40) എന്നിവരാണ് നോർത്ത് പോലീസിന്‍റെ പിടിയിലായത്. കടയുടെ സമീപത്തെ സിസിടിവി ദൃശ്യങ്ങളും ഇവരെ പിടികൂടാൻ സഹായിച്ചു. പരിചയമില്ലാത്തവർ എടുത്താൽ തത്തമ്മ ബഹളം വയ്ക്കുമെന്നതിനാൽ അടുത്തടുത്ത ദിവസങ്ങളിലായി ഇവർ കടയിലെത്തി ഇവയുമായി ചങ്ങാത്തത്തിലായിരുന്നു. മോഷ്ടിച്ച മൃഗങ്ങളെ ഇവരുടെ വീട്ടിൽ നിന്ന് പോലീസ് കണ്ടെടുത്തു. അറസ്റ്റ് ചെയ്ത പ്രതികളെ കോടതി റിമാൻഡ് ചെയ്തു.

ചിത്രങ്ങള്‍ കടപ്പാട് - മനോരമ