വൈദ്യുതി ബിൽ സബ്സിഡി ഇന്നു മുതൽ; ബിൽ അടച്ചവർക്കും കെഎസ്ഇബി ആനുകൂല്യം

തിരുവനന്തപുരം: ലോക്ക്ഡൗൺ കാലത്ത് അമിത വൈദ്യുതി ബിൽ ഈടാക്കിയെന്ന ആരോപണത്തിനു പിന്നാലെ സര്‍ക്കാര്‍ ലഭ്യമാക്കുന്ന സബ്സിഡി അടങ്ങിയ ബിൽ ഇന്നു മുതൽ വിതരണം ചെയ്തു തുടങ്ങും. നിലവിൽ ബിൽ അടച്ചവര്‍ക്കും ബില്ലിൻ്റെ ആനുകൂല്യം ലഭിക്കുമെന്നാണ് കെഎസ്ഇബി അറിയിച്ചിട്ടുള്ളത്.

രണ്ട് മാസം കൊണ്ട് 40 യൂണിറ്റിൽ താഴെ ഉപയോഗിക്കുന്ന 500 വാട്സിൽ താഴെ കണക്ടഡ് ലോഡുള്ളവര്‍ക്ക് വൈദ്യുതി എത്ര ഉപയോഗിച്ചാലും ബില്ലടയ്ക്കേണ്ടതില്ല. എന്നാൽ രണ്ടു മാസത്തെ ഉപയോഗം 80 യൂണിറ്റോ അതിൽ താഴെയോ ആണെങ്കിൽ 1000 വാട്സിൽ താഴെ കണക്ടഡ് ലോഡുള്ള ബിപിഎല്ലുകാര്‍ക്ക് റീഡിങ് എത്രയാണെങ്കിലും യൂണിറ്റിന് 1.50 രൂപയാണ് നിരക്ക്. 50 യൂണിറ്റ് വരെ 50 ശതമാനവും 100 യൂണിറ്റ് വരെ 30 ശതമാനവും 150 യൂണിറ്റ് വരെ 25 ശതമാനവും സബ്സിഡി ലഭിക്കും. 150 യൂണിറ്റിലധികമാണെങ്കിൽ 20 ശതമാനമാണ് സബ്സിഡി ലഭിക്കുക.

Also Read: ഒരു വർഷത്തേയ്ക്ക് മലയാളിയുടെ ജീവിതത്തിൽ ഈ 5 മാറ്റങ്ങൾ; പുതിയ നിയമം പാസാക്കി സർക്കാർ

ജൂലൈ 6 മുതലുളള ബില്ലുകള്‍ക്ക് അര്‍ഹമായ സബ്‍സിഡി നല്‍കുമെന്നാണ് കെഎസ്ഇബി അറിയിച്ചിട്ടുള്ളത്. ഏപ്രിൽ 20 മുതൽ ജൂൺ 19 വരെ വൈദ്യുതി ബിൽ അടച്ചവര്‍ക്കാണ് സബ്സിഡിയുടെ പ്രയോജനം ലഭിക്കുക. ഇനി ലഭിക്കുന്ന വൈദ്യുതി ബില്ലിലും സബ്സിഡിയുടെ വിവരങ്ങള്‍ രേഖപ്പെടുത്തിയിട്ടുണ്ടാകും. ബിൽ നൽകുന്നതിനു രണ്ട് ദിവസം മുൻപെങ്കിലും സബ്സിഡി സംബന്ധിച്ച വിവരങ്ങള്‍ അടങ്ങുന്ന എസ്എംഎസ് നല്‍കാനാണ് കെഎസ്ഇബിയുടെ തീരുമാനം. ഓഗസ്റ്റ് മാസത്തോടെ ബിൽ വിതരണം പൂര്‍ത്തിയാക്കുകയും ചെയ്യും.

Also Read: യുദ്ധമുനമ്പിൽ യുഎസും ചൈനയും: അമേരിക്കൻ കപ്പലുകൾ തകര്‍ക്കുമെന്ന് ചൈനയുടെ താക്കീത്

ലോക്ക്ഡൗൺ കാലത്തിനു മുൻപുള്ള ഡോര്‍ ലോക്ക് മൂലമുള്ള അഡ്ജസ്റ്റ്മെൻ്റുകള്‍, മുൻപുണ്ടായിരുന്ന കുടിശികകള്‍, മറ്റേതെങ്കിലും വകയിൽ അടയ്ക്കാനുള്ള തുക എന്നിവ ബിൽ തുകയിൽ കണക്കാക്കില്ല. ഇതിനു പുറമെ വാണിജ്യ, വ്യവസായ ഉപഭോക്താക്കള്‍ക്കും ആശുപത്രികള്‍ക്കും ഫിക്സഡ് ചാര്‍ജിൽ അടക്കം 25 ശതമാനം ഇളവ് നല്‍കുകയും ചെയ്യും. മാര്‍ച്ച് ഒന്നു മുതൽ മെയ് 31 വരെയുള്ള വൈദ്യുതി ചാര്‍ജിൻ്റെ ഫിക്സഡ് നിരക്കിനാണ് ഇത് ബാധകമാകുക.

അതേസമയം, സബ്സിഡി ലഭിക്കുന്നതിനായി സോഫ്റ്റ്‍‍വെയര്‍ പരിഷ്കരിക്കുന്നതിനിടെ ഏപ്രിൽ 20 മുതൽ ജൂൺ 19 വരെ ലഭിച്ച ബില്ലുകള്‍ അടയ്ക്കുന്നവര്‍ക്ക് 70 ശതമാനം തുക മാത്രം അടയ്ക്കാനുള്ള അവസരവും നല്‍കും. ബാക്കി തുക പിഴയില്ലാതെ അടുത്ത ബില്ലിനൊപ്പം അടയ്ക്കാം.