പിടിമുറുക്കി ജോസ് കെ മാണി; പാലാ വിട്ടുകൊടുക്കില്ലെന്ന് മാണി സി കാപ്പൻ; എൽഡിഎഫിൽ നെഞ്ചിടിപ്പേറുന്നു

പാലാ: തദ്ദേശ തെരഞ്ഞെടുപ്പിൽ കേരള കോൺഗ്രസ് ജോസ് കെ മാണി വിഭാഗം മികച്ച പ്രകടനം കാഴ്ചവെച്ചതിനു പിന്നാലെ പാലാ നിയമസഭ സീറ്റിനെച്ചൊല്ലി എൽഡിഎഫ് ഘടകകക്ഷികള്‍ തമ്മിൽ തര്‍ക്കം മുറുകുന്നു. കേരള കോൺഗ്രസിൻ്റെ ശക്തി തെളിഞ്ഞെന്നും പാലാ നിയമസഭാ സീറ്റ് കേരള കോൺഗ്രസിന് എൽഡിഎഫ് തരുമെന്നുമാണ് പ്രതീക്ഷയെന്ന് ജോസ് കെ മാണി പറഞ്ഞു. എന്നാൽ സീറ്റ് വിട്ടുകൊടുക്കാനാകില്ലെന്ന് സിറ്റിങ് എംഎൽഎയായ മാണി സി കാപ്പൻ്റെയും എൻസിപിയുടെയും നിലപാട്.

തദ്ദേശ തെരഞ്ഞെടുപ്പിൽ കേരള കോൺഗ്രസ് ശക്തി തെളിയിച്ചെന്നായിരുന്നു ജോസ് കെ മാണിയുടെ പ്രതികരണം. പാലാ നിയോജക മണ്ഡലം സീറ്റ് ഉള്‍പ്പെടെ തങ്ങള്‍ക്ക് അര്‍ഹമായത് എൽഡിഎഫ് തരുമെന്നാണ് പ്രതീക്ഷിക്കുന്നതെന്ന് അദ്ദേഹം ഏഷ്യാനെറ്റ് ന്യൂസിനോടു പറഞ്ഞു. യുഡിഎഫിൻ്റെ ഭാഗമായിരുന്ന കേരള കോൺഗ്രസിനെതിരെ ഉപതെരഞ്ഞെടുപ്പിൽ എൻസിപി സ്ഥാനാര്‍ഥി മാണി സി കാപ്പൻ ശക്തമായ വിജയം നേടിയിരുന്നു. എന്നാൽ മാണി സി കാപ്പൻ്റെ പ്രശ്നം ഉള്‍പ്പെടെ എൽഡിഎഫിനുള്ളിൽ ചര്‍ച്ച ചെയ്യേണ്ടതാണെന്നാണ് ജോസ് കെ മാണിയുടെ പ്രതികരണം. അതേസമയം, താൻ രാജ്യസഭാംഗത്വം ഉടൻ രാജിവെക്കുമെന്ന് ജോസ് കെ മാണി വ്യക്തമാക്കിയിട്ടുണ്ട്.

Also Read: അഭിപ്രായ ഭിന്നത, പിന്നാലെ തെരഞ്ഞെടുപ്പ് തിരിച്ചടി; നിയമസഭ തെരഞ്ഞെടുപ്പിന് മുന്നേ കെ സുരേന്ദ്രൻ തെറിക്കുമോ?

ജോസഫ് വിഭാഗവുമായി തെറ്റിയ ശേഷം ജോസ് കെ മാണി വിഭാഗം എൽഡിഎഫിൽ എത്തിയതിനു പിന്നാലെ പാലാ സീറ്റിനെച്ചാല്ലിയുള്ള ആശങ്കയാണ് പുതിയ തലത്തിലേയ്ക്ക് എത്തിയത്. പാലാ സീറ്റ് വിട്ടുകൊടുക്കില്ലെന്നും കഴിഞ്ഞ തവണ മത്സരിച്ച അതേ സീറ്റിൽ തന്നെ മത്സരിക്കുമെന്നുമാണ് എൻസിപി നേതാക്കളുടെ നിലപാട്. ജോസ് കെ മാണിയോടു മറുപടി പറയാനില്ലെന്നും എന്നാൽ അടുത്ത തവണയും പാലായിൽ തന്നെ മത്സരിക്കുമെന്നും എൻസിപി നേതാവ് പീതാംബരൻ മാസ്റ്റര്‍ വ്യക്തമാക്കി.

പാലാ സീറ്റ് വിട്ടുകൊടുക്കുന്ന പ്രശ്നമില്ലെന്നായിരുന്നു മാധ്യമങ്ങളോട് മാണി സി കാപ്പൻ്റെ പ്രതികരണം. പാലായിൽ തനിക്കാണ് ഭൂരിപക്ഷം. ഇക്കാര്യത്തിൽ ആര്‍ക്കും സംശയം വേണ്ട. പാലാ മണ്ഡലത്തിൽ തനിക്ക് ലഭിച്ച ഭൂരിപക്ഷം ജോസ് കെ മാണി വിഭാഗത്തിനു ലഭിച്ചിട്ടില്ലെന്നും മാണി സി കാപ്പൻ പറഞ്ഞു. ഇടതുമുന്നണിയിൽ തനിക്ക് സീറ്റില്ലെന്ന് പറഞ്ഞിട്ടില്ലെന്നും മാണി സി കാപ്പൻ പറഞ്ഞു.

Also Read: തൃശൂർ, കൊച്ചി കോർപറേഷനുകൾ ഇടത്തേക്ക്; വിമതർ എൽഡിഎഫിനോട് സഹകരിക്കും

അതേസമയം, ജോസഫ് വിഭാഗത്തിൽ നിന്നുള്ള പല നേതാക്കളും കേരള കോൺഗ്രസിലെത്തുമെന്ന് ജോസ് കെ മാണി അവകാശപ്പെട്ടു. പല നേതാക്കളും തന്നെ വ്യക്തിപരമായി ബന്ധപ്പെട്ടിട്ടുണ്ടെന്നും പരസ്യമായി മാധ്യമങ്ങളോടു പ്രതികരിക്കാത്തതാണെന്നും ജോസ് കെ മാണി വാര്‍ത്താ ചാനലിനോടു പറഞ്ഞു.