ചെക്ക് കേസിൽ നിന്ന് മോചിതനായ തുഷാർ വെള്ളാപ്പള്ളി കൊച്ചിയിലെത്തി

കൊച്ചി: ചെക്ക് കേസിൽ നിന്ന് മോചിതനായ തുഷാർ വെള്ളാപ്പള്ളി കൊച്ചിയിലെത്തി. തൃശൂർ സ്വദേശിയായ നാസിൽ അബ്ദുള്ള ദുബൈയിൽ കേസ് കൊടുത്തതിനെ തുടർന്നാണ് തുഷാറിനെ അജ്‌മാൻ പോലീസ് അറസ്റ്റ് ചെയ്തത്. മടങ്ങിയെത്തിയ തുഷാറിന് വിമാനത്താവളത്തെ ബിഡിജെഎസ് പ്രവർത്തകർ സ്വീകരണം നൽകി.

ആലുവയിൽ സംഘടിപ്പിച്ചിരിക്കുന്ന ബിഡിജെഎസ് പ്രവർത്തകരുടെ സ്വീകരണ യോഗത്തിൽ തുഷാർ പങ്കെടുക്കും. ചെക്ക് കേസ് തള്ളി പോയതിനെ തുടർന്നാണ് തുഷാറിന് കേരളത്തിലേക്ക് മടങ്ങി വരാൻ സാധിച്ചത്. നാസിൽ അബ്ദുള്ളക്ക് തുഷാറിനെതിരെ വ്യക്തമായ രേഖകൾ കോടതിയിൽ ഹാജരാക്കാൻ സാധിച്ചില്ല.തുടർന്നാണ് കേസ് തള്ളിയതായി അജ്‌മാൻ കോടതി ഉത്തരവിട്ടത്.

കേസ് രജിസ്റ്റർ ചെയ്തിരുന്നതിനാൽ തുഷാറിന്റെ പാസ്‌പോർട്ട് തടഞ്ഞു വെച്ചിരുന്നു. പാസ്‌പോർട്ട് വിട്ടു കിട്ടാതിരുന്നതിനെ തുടർന്ന് തുഷാറിന്റെ മടങ്ങി വരവ് നീളുകയായിരുന്നു. തനിക്കെതിരെയുള്ള കേസ് ഗൂഡാണാലോചനയുടെ ഭാഗമാണെന്ന് നേരത്തെ തുഷാർ പ്രതികരിച്ചിരുന്നു. കുറ്റവിമുക്തനായതോടെ നീതിയുടെ വിജയമാണിതെന്നും തുഷാർ പ്രതികരിച്ചു. അതെ സമയം, ഗൂഢാലോചന, കൃത്രിമ രേഖ ചമയ്ക്കൽ എന്നീ വകുപ്പുകൾ ചുമത്തി നാസിൽ അബ്ദുള്ളക്കെതിരെ അജ്‌മാനിൽ കേസ് കൊടുക്കാൻ തുഷാർ ഒരുങ്ങുന്നുണ്ട്.