മദ്യം വാങ്ങാനുള്ള പ്രായപരിധി 23 ആക്കും

തിരുവനന്തപുരം: മദ്യം വാങ്ങാനുള്ള പ്രായ പരിധി ഉയർത്താൻ മന്ത്രിസഭ തീരുമാനിച്ചു. മദ്യം വാങ്ങാനുള്ള പ്രായപരിധി 21 ൽ നിന്ന് 23 ആക്കി ഉയർത്താനാണ് തീരുമാനം. ഇതിനായി അബ്‌കാരി നിയമം ഭേദഗതി ചെയ്ത് ഓർഡിനൻസ് പുറപ്പെടുവിക്കാൻ സർക്കാർ ഗവർണറോട് ശുപാർശ ചെയ്യും.

മദ്യം വാങ്ങുന്നതിനുള്ള പ്രായപരിധി ഉയർത്തുമെന്ന് എൽഡിഎഫ് മദ്യനയത്തിൽ പറഞ്ഞിരുന്നു. കഴിഞ്ഞ ജൂൺ എട്ടിനാണ് മന്ത്രിസഭ മദ്യനയം അംഗീകരിച്ചത്. പ്രായം കുറഞ്ഞവർക്ക് മദ്യം നൽകുന്ന വിൽപനക്കാരെ ശിക്ഷിക്കണമെന്നുള്ള ശുപാർശ മന്ത്രിസഭായോഗം ഇന്ന് അംഗീകരിച്ചു. ഫോറിൻ ലിക്വർ റൂളിലും ഇത് സംബന്ധിച്ച് ഉടൻ മാറ്റങ്ങൾ ഉണ്ടാകും. നിയമസഭ കൂടുമ്പോൾ പ്രത്യേക ബിൽ കൊണ്ടുവരാനും യോഗം തീരുമാനിച്ചു.