കോൺഗ്രസ് വക്താവ് ഷമാ മുഹമ്മദ് നിയമസഭാ തെരഞ്ഞെടുപ്പിൽ മത്സരിച്ചേക്കും

കണ്ണൂര്‍: കോൺഗ്രസ് വക്താവ് ഷമാ മുഹമ്മദ് ഇത്തവണ നിയമസഭാ തെരഞ്ഞെടുപ്പിൽ യുഡിഎഫ് സ്ഥാനാര്‍ഥിയായേക്കും. കണ്ണൂര്‍ സ്വദേശിയായ ഡോ. ഷമാ മുഹമ്മദ് കഴിഞ്ഞ മൂന്ന് വര്‍ഷമായി എഐസിസി വക്താവായി മാധ്യമങ്ങളുമായി ഇടപഴകുന്നുണ്ട്. ഈ തെരഞ്ഞെടുപ്പിൽ യുവാക്കള്‍ക്കും സ്ത്രീകള്‍ക്കും കൂടുതൽ പരിഗണന നല്‍കുന്നതിൻ്റെ ഭാഗമായാണ് ഷമാ മുഹമ്മദിനെ സ്ഥാനാര്‍ഥിയാക്കാനുള്ള സാധ്യത പാര്‍ട്ടി പരിശോധിക്കുന്നത്.

പൂനെയിൽ ഡോക്ടറായി ജോലി ചെയ്യുന്ന ഷമാ മുഹമ്മദ് സാമൂഹ്യപ്രവര്‍ത്തനരംഗത്തും സജീവമാണ്. ന്യൂനപക്ഷ വിഭാഗക്കാരിയായതു കൊണ്ടാണ് ഷമാ മുഹമ്മദിന് കൂടുതൽ സാധ്യത കൽപ്പിക്കുന്നതെന്നാണ് മാതൃഭൂമി റിപ്പോര്‍ട്ട്. തളിപ്പറമ്പ് മണ്ഡലത്തിൽ പാര്‍ട്ടി ആവശ്യപ്പെട്ടാൽ മത്സരിക്കുമെന്ന് അവര്‍ പ്രതികരിച്ചു.

മുൻപ് കേരള കോൺഗ്രസ് എം മത്സരിക്കുന്ന തളിപ്പറമ്പ് മണ്ഡലത്തിൽ ഇത്തവണ കോൺഗ്രസാണ് മത്സരിക്കുന്നത്. ഇതിനു പുറമെ കഴിഞ്ഞ തവണ എൽജെഡി മത്സരിച്ച കൂത്തുപറമ്പിലും കോൺഗ്രസ് സ്ഥാനാര്‍ഥി തന്നെ മത്സരിക്കാൻ സാധ്യതയുണ്ടെങ്കിലും ഈ സീറ്റ് ലീഗ് ആവശ്യപ്പെട്ടിട്ടുണ്ട്.

കണ്ണൂര്‍ ജില്ലയിലും സാമൂഹ്യരാഷ്ട്രീയ രംഗങ്ങളിൽ സജീവമായ ഷമാ മുഹമ്മദ് കഴിഞ്ഞ തദ്ദേശ തെരഞ്ഞെടുപ്പ് കാലത്ത് കണ്ണൂര്‍ കോര്‍പ്പറേഷനിലും പ്രചാരണത്തിനിറങ്ങിയിരുന്നു. ഇത് നിയമസഭാ തെരഞ്ഞെടുപ്പിൽ മത്സരിക്കുന്നതിനു മുന്നോടിയായിരുന്നുവെന്നാണ് റിപ്പോര്‍ട്ട്.

അതേസമയം, കോൺഗ്രസ് കേന്ദ്ര, സംസ്ഥാന നേതൃത്വങ്ങളാണ് സ്ഥാനാര്‍ഥിത്വത്തിൻ്റെ കാര്യത്തിൽ തീരുമാനമെടുക്കേണ്ടതെന്ന് ഷമാ മുഹ്മമദ് പറഞ്ഞു. കണ്ണൂരിൽ മത്സരിക്കാൻ താത്പര്യമുണ്ട്, എന്നാൽ എഐസിസി വക്താവ് എന്ന നിലയിലാണ് ഇപ്പോള്‍ പ്രവര്‍ത്തിക്കുന്നതെന്നും ഷമാ മുഹമ്മദ് വ്യക്തമാക്കി.