കരിപ്പൂരിൽ വലിയ വിമാനങ്ങള്‍ ഇറക്കാൻ സുരക്ഷാപരിശോധന തിങ്കളാഴ്ച മുതൽ

ന്യൂഡൽഹി: കരിപ്പൂര്‍ രാജ്യാന്തരവിമാനത്താവളത്തിൽ വലിയ വിമാനങ്ങള്‍ ഇറക്കുന്നതിനു മുന്നോടിയായി തിങ്കളാഴ്ച മുതൽ സുരക്ഷാപരിശോധന നടത്തുമെന്ന് എയര്‍ ഇന്ത്യ. വിമാനത്താവളത്തിന്‍റെ ഉപദേശകസമിതി ചെയര്‍മാൻ കൂടിയായ കുഞ്ഞാലിക്കുട്ടി എംപിയ്ക്ക് ഇതുസംബന്ധിച്ച അറിയിപ്പ് ലഭിച്ചു. കഴിഞ്ഞ മാസം കേരളത്തിൽ നിന്നുള്ള എംപിമാരുടെ സംഘം എയര്‍ ഇന്ത്യ ചെയര്‍മാനെ സന്ദര്‍ശിച്ച് നിവേദനം നല്‍കിയിരുന്നു.

കരിപ്പൂരിൽ നിന്ന് വലിയ വിമാനങ്ങളുടെ സര്‍വീസ് പുനരാരംഭിക്കണമെന്ന് ചൂണ്ടിക്കാട്ടി പി കെ കുഞ്ഞാലിക്കുട്ടി, എം കെ രാഘവൻ, ഇ ടി മുഹമ്മദ് ബഷീര്‍, പി വി അബ്ദുള്‍ വഹാഖ്, എം ഐ ഷാനവാസ് എന്നിവരാണ് എയര്‍ ഇന്ത്യ ചെയര്‍മാനും മാനേജിങ് ഡയറക്ടറുമായ പ്രദീപ് സിങ് ഖരോലയെ കണ്ട് നിവേദനം നല്‍കിയത്. കരിപ്പൂരിൽ നിന്ന് ദുബായിലേയ്ക്കും മദീനയിലേയ്ക്കും പുതിയ സര്‍വീസുകള്‍ ആരംഭിക്കണമെന്നും എംപിമാരുടെ സംഘം ആവശ്യപ്പെട്ടു.

മൂന്നുവര്‍ഷം മുൻപാണ് അറ്റകുറ്റപ്പണികളുടെ പേരിൽ കരിപ്പൂര്‍ വിമാനത്താവളത്തിൽ വലിയ വിമാനങ്ങള്‍ക്ക് വിലക്ക് ഏര്‍പ്പെടുത്തിയത്.