ബ്രൂവറി വിവാദത്തിന് പിന്നിൽ അന്യസംസ്ഥാന മദ്യലോബി: എ കെ ബാലൻ

കോഴിക്കോട്: സംസ്ഥാനത്ത് സ്വകാര്യ ബ്രൂവറികള്‍ അനുവദിക്കുന്നതിനെതിരെ പ്രതിപക്ഷം ഉന്നയിക്കുന്ന ആരോപണങ്ങള്‍ക്ക് പിന്നിൽ അന്യസംസ്ഥാനത്തു നിന്ന് മദ്യമെത്തിക്കുന്ന ലോബിയാണെന്ന് മന്ത്രി എ കെ ബാലൻ. സംസ്ഥാനത്തിന് ആവശ്യമായതിന്‍റെ 25ശതമാനം പോലും മദ്യം ഇവിടെ ഉത്പാദിപ്പിക്കുന്നില്ലെന്നും പൊതുമേഖലയിലും സ്വകാര്യമേഖലയിലും ബ്രൂവറികളും ഡിസ്റ്റിലറികളും കൂട്ടണമെന്നും എ കെ ബാലൻ ആവശ്യപ്പെട്ടു. നിയമവിരുദ്ധമായി ഒന്നും ചെയ്തിട്ടില്ലെന്നും അദ്ദേഹം കൂട്ടിച്ചേര്‍ത്തു. കോഴിക്കോട് സംസാരിക്കുകയായിരുന്നു മന്ത്രി.

ബ്രൂവറിയ്ക്ക് അനുമതി നല്‍കി എന്നതിനര്‍ഥം ലൈസൻസ് നല്‍കി എന്നല്ലെന്ന് എക്സൈസ് മന്ത്രി ടി പി രാമകൃഷ്ണനും പറഞ്ഞു. കേരളത്തിന്‍റെ വരുമാനവും തൊഴിൽ സാധ്യതയുമാണ് പരിഗണിച്ചതെന്നും വി എസ് ഉന്നയിച്ച ആശങ്ക പരിശോധിക്കുമെന്നും ടി പി രാമകൃഷ്ണൻ പറഞ്ഞു. പരസ്പരവിരുദ്ധമായാണ് വി എസ് സംസാരിക്കുന്നതെന്നും മന്ത്രി ആരോപിച്ചു.

അതേസമയം, കുടിവെള്ളക്ഷാമം രൂക്ഷമായ എലപ്പുള്ളിയിൽ ബ്രൂവറിയ്ക്ക് അനുമതി നല്‍കിയത് കേന്ദ്ര ഭൂഗര്‍ഭജലവകുപ്പിന്‍റെ കണ്ടെത്തലുകള്‍ പരിഗണിക്കാതെയാണെന്ന റിപ്പോര്‍ട്ടുകളും പുറത്തുവന്നിട്ടുണ്ട്.