കോഴിക്കോട്: യുഎപിഎ ചുമത്തി അറസ്റ്റ് ചെയ്യപ്പെട്ട അലന്‍ ഷുഹൈബിനും താഹ ഫസലിനും മാവോയിസ്റ്റ് ബന്ധമുണ്ടെന്ന് സിപിഎം. ഇരുവരെയും പാര്‍ട്ടിയില്‍ നിന്ന് പുറത്താക്കിയതായും സിപിഎം ലോക്കല്‍ കമ്മിറ്റി യോഗത്തില്‍ റിപ്പോര്‍ട്ട് ചെയ്‍തു. അലനെയും താഹയെയും പുറത്താക്കിയതായി സിപിഎം ജില്ലാ സെക്രട്ടറിയേറ്റംഗം ടിപി ദാസനാണ് പന്നിയങ്കര ലോക്കല്‍ കമ്മിറ്റിയില്‍ റിപ്പോര്‍ട്ട് ചെയ്‍തത്. തത്കാലം നടപടി പരസ്യപ്പെടുത്തില്ലെന്നും അറിയിച്ചിട്ടുണ്ട്. എല്ലാ ബ്രാഞ്ചുകളിലെയും അംഗങ്ങളുടെ പ്രവര്‍ത്തനം പരിശോധിക്കാനും തീവ്ര ഇടത് വ്യതിയാനമുള്ളവരെ പുറത്താക്കാനും സിപിഎം തീരുമാനിച്ചിട്ടുണ്ട്.

സിപിഎം നേതൃത്വം നിയോഗിച്ച മൂന്നംഗ കമ്മീഷന്‍റെ അന്വേഷണ റിപ്പോര്‍ട്ടിന്‍റെ അടിസ്ഥാനത്തിലാണ് അലനും ഷുഹൈബിനുമെതിരായ നടപടി. വിദ്യാര്‍ഥികളുടെ രാഷ്ട്രീയ വ്യതിയാനം മനസ്സിലാക്കാന്‍ കഴിയാതെ പോയത് സ്വയം വിമര്‍ശനമായി കരുതണമെന്നും സിപിഎം റിപ്പോര്‍ട്ടില്‍ പറയുന്നു.

Also Read കെഎസ്ആര്‍ടിസി ബസ് ഡ്രൈവര്‍ കുഴഞ്ഞുവീണു; യാത്രക്കാര്‍ക്ക് രക്ഷകനായി കണ്ടക്ടര്‍

ശനിയാഴ്‍ചയാണ് അലന്‍ ഉള്‍പ്പെടുന്ന പന്നിയങ്കര ലോക്കല്‍ കമ്മിറ്റി യോഗം ചേര്‍ന്നത്. ഈ യോഗത്തിലാണ് അലനും താഹയ്‍ക്കുമെതിരായ റിപ്പോര്‍ട്ട് നല്‍കിയത്. ഇരുവരെയും തെറ്റുതിരുത്തി പാര്‍ട്ടിക്കൊപ്പം നിര്‍ത്തി തിരിച്ചുവരാനുള്ള അവസരം നല്‍കണമെന്നും ലോക്കല്‍ കമ്മിറ്റി യോഗത്തില്‍ അഭിപ്രായമുയര്‍ന്നു.

കോഴിക്കോട് ജില്ലാ ജയിലില്‍ കഴിയുന്ന അലന്‍റെയും താഹയുടെയും ജാമ്യാപേക്ഷ ഹൈക്കോടതി 14-നാണ് പരിഗണിക്കുന്നത്. ജാമ്യത്തെ ശക്തമായി എതിര്‍ക്കാനാണ് പ്രോസിക്യൂഷന്‍ തീരുമാനം. ഡിജിറ്റല്‍ തെളിവുകള്‍ ഉള്‍പ്പെടെ കോടതിയില്‍ ഹാജരാക്കും.

Also Read മണ്ഡലകാലം ഞായറാഴ്ച മുതൽ, ശബരിമല വിധി ഉടൻ; അയോധ്യയ്ക്ക് പിന്നാലെ സുപ്രീംകോടതിയിലേക്ക് കാതോർത്ത് രാജ്യം

അതേസമയം, ഇവരെ അറസ്റ്റ് ചെയ്യുമ്പോള്‍ രക്ഷപ്പെട്ട മൂന്നാമന്‍ എവിടെയെന്ന് ഇതുവരെ പോലീസിന് വിവരം ലഭിച്ചിട്ടില്ല.