കുട്ടികള്‍ക്കൊപ്പം ഉച്ചഭക്ഷണം കഴിച്ച് ആലപ്പുഴ കളക്ടര്‍

ആലപ്പുഴയിലെ നീര്‍ക്കുന്നം എസ്.ഡി.വി സ്‍കൂളിലെ കുട്ടികള്‍ക്കൊപ്പം ബുധനാഴ്‍ച്ച ഉച്ചഭക്ഷണം കഴിക്കാന്‍ പ്രത്യേക അതിഥി ഉണ്ടായിരുന്നു. ആലപ്പുഴ ജില്ല കളക്ടര്‍ എസ്. സുഹാസ് (ഐ.എ.എസ്) ആണ് ശ്രീ ദേവി വിലാസം സര്‍ക്കാര്‍ സ്‍കൂളില്‍ ഭക്ഷണം കഴിക്കാന്‍ വന്നത്.

കളക്ടറുടെ സന്ദര്‍ശനം സ്‍കൂളിലെ ഉച്ചഭക്ഷണത്തിന്‍റെ നിലവാരം നേരിട്ട് ബോധ്യപ്പെടുന്നതിനായിരുന്നു. സ്‍കൂളിലെ അടുക്കളയില്‍ എത്തി പരിശോധന നടത്തിയ സുഹാസ്, ഗുണമേന്മയുള്ള ഭക്ഷണമാണ് കുട്ടികള്‍ക്ക് ലഭിക്കുന്നതെന്ന് ഉറപ്പുവരുത്തി.


1600 കുട്ടികള്‍ പഠിക്കുന്ന സര്‍ക്കാര്‍ വിദ്യാലയമാണ് എസ്.ഡി.വി സ്‍കൂള്‍. കുട്ടികളുടെ എണ്ണത്തില്‍ ആലപ്പുഴയിലെ ഏറ്റവും വലിയ സ്‍കൂളും ഇതാണ്.

ചോറ്, തൈര്, വെള്ളരിക്ക, ഉരുളക്കിഴങ്ങ് എന്നിവയായിരുന്നു ഭക്ഷണത്തിനുണ്ടായിരുന്നത്.


2012 ബാച്ചിലെ ഐഎഎസ് ഉദ്യോഗസ്ഥനാണ് സുഹാസ്. ആദിവാസി മേഖലകളിലെ കുട്ടികള്‍ ഇടയ്ക്കുവച്ച് പഠനം അവസാനിപ്പിക്കുന്നതില്‍ പ്രത്യേക പഠനം നടത്തി ശ്രദ്ധ നേടിയിട്ടുള്ളയാളാണ് എസ്.സുഹാസ്.