കൊച്ചി മെട്രോ എംഡിയായി അല്‍കേഷ് കുമാര്‍ ഐഎഎസ് ചുമതലയേറ്റു

കൊച്ചി: കെഎംആർഎൽ മാനേജിംഗ് ഡയറക്ടറായി അൽകേഷ് കുമാർ ശർമ ഐഎഎസ് ചുമതലയേറ്റു. ഇന്നലെ കൊച്ചി മെട്രോ റെയിൽ ലിമിറ്റഡ് ഓഫീസില്‍ നടന്ന ചടങ്ങില്‍ മുൻ എംഡി എപിഎം മുഹമ്മദ് ഹനീഷില്‍ നിന്നാണ് അദ്ദേഹം ചുമതല ഏറ്റുവാങ്ങിയത്.

മെട്രോ എംഡിയായി ചുമതലയേല്‍ക്കുന്നതിന് മുമ്പ് ഡൽഹി മുംബൈ ഇൻഡസ്ട്രിയൽ കോറിഡോർ ഡെവലപ്മെന്‍റ് കോർപറേഷൻ ലിമിറ്റഡിന്‍റെ ചീഫ് എക്സിക്യൂട്ടിവ് ഓഫീസർ, മാനേജിംഗ് ഡയറക്ടർ എന്നീ ചുമതലകൾ വഹിച്ചുവരികയായിരുന്നു അദ്ദേഹം. എന്‍ഐസിഡിഐടിയുടെ സിഇഒ ആയും അല്‍കേഷ് കുമാര്‍ പ്രവര്‍ത്തിച്ചിട്ടുണ്ട്.

മെട്രോ എംഡിയ്ക്ക് പുറമെ കൊച്ചിൻ സ്മാർട്ട് മിഷൻ ലിമിറ്റഡിന്‍റെ ചുമതലയും ഔദ്യോഗികമായി അൽകേഷ് കുമാർ ശർമ ഏറ്റെടുത്തു. കെഎംആർഎൽ ഡയറക്ടർമാരും മറ്റു മുതിർന്ന ഉദ്യോഗസ്ഥരുമായി ചർച്ച നടത്തിയ പുതിയ എംഡി പേട്ട പാതയുടെ ഉദ്ഘാടനം 2020 ഫെബ്രുവരിയിൽ നടത്താനാകുമെന്ന് പ്രതീക്ഷിക്കുന്നതായും പറഞ്ഞു.


കൊച്ചി മെട്രോ എംഡിയായിരുന്ന എപിഎം മുഹമ്മദ് ഹനീഷിനെ തൊഴിലും നൈപുണ്യവും വകുപ്പ് സെക്രട്ടറിയായാണ് മാറ്റി നിയമിച്ചിരിക്കുന്നത്. നികുതി വകുപ്പ് സെക്രട്ടറി, ചേരമാന്‍ ഫിനാന്‍ഷ്യല്‍ സര്‍വീസ് ലിമിറ്റഡ് മാനേജിങ് ഡയറക്ടര്‍ എന്നീ ചുമതലകളും ഹനീഷിനുണ്ട്.