അഭിമന്യു കേസിൽ പിടിയിലായവരെല്ലാം പ്രധാനപ്രതികളെന്ന് പോലീസ്

കൊച്ചി: മഹാരാജാസ് കോളേജ് വിദ്യാര്‍ഥിയും എസ്എഫ്ഐ നേതാവുമായ അഭിമന്യുവിന്‍റെ വധവുമായി ബന്ധപ്പെട്ട് പിടിയിലായവരെല്ലാം പ്രധാനപ്രതികളാണെന്ന് പോലീസ്. കേസുമായി ബന്ധപ്പെട്ട എല്ലാ പ്രതികളെയും കുറിച്ചുള്ള വിവരങ്ങള്‍ ലഭിച്ചിട്ടുണ്ടെന്നും എറണാകുളം സിറ്റി പോലീസ് കമ്മീഷണര്‍ എം ബി ദിനേശ് അറിയിച്ചു.

ഇതുവരെ ഏഴുപേരെയാണ് കേസുമായി ബന്ധപ്പെട്ട് അറസ്റ്റ് ചെയ്തത്. പിടിയിലായ ഒരാളുടെ അറസ്റ്റ് രണ്ട് ദിവസത്തിനുള്ളിൽ രേഖപ്പെടുത്തും. അതേസമയം കേസിലെ മറ്റുപ്രതികള്‍ വിദേശത്തേയ്ക്ക് കടന്നോയെന്ന് അന്വേഷിക്കുകയാണ് പോലീസ്.

കൊലപാതകം കഴിഞ്ഞ് എട്ടുദിവസം കഴിഞ്ഞിട്ടും അന്വേഷണത്തിൽ കാര്യമായ പുരോഗതിയുണ്ടായിട്ടില്ലെന്ന വാദത്തെ ഖണ്ഡിക്കുന്നതാണ് കമ്മീഷണറുടെ വാക്കുകള്‍.

പ്രതികള്‍ക്കായി പോലീസ് തമിഴ്നാട്ടിലേയ്ക്കും കര്‍ണാടകയിലേയ്ക്കും തിരച്ചിൽ വ്യാപിപ്പിച്ചിരുന്നു. ഇവര്‍ക്ക് സാമ്പത്തികസഹായം ലഭിച്ചിട്ടുണ്ടോയെന്നും അന്വേഷിക്കുന്നുണ്ട്.

കേസിൽ നേരിട്ട് പങ്കുള്ള ആറുപേരെയാണ് ഇനി പിടികൂടാനുള്ളത്. കൊലപാതകം നടത്തിയ പ്രതികളെ കോളേജിലേയ്ക്ക് വിളിച്ചു വരുത്തിയ മുഹമ്മദ് എന്ന വിദ്യാര്‍ഥി ഉള്‍പ്പെടെയുള്ളവരാണിവര്‍. എന്നാൽ മുഹമ്മദിന്‍റെ കുടുംബാംഗങ്ങള്‍ ഉള്‍പ്പെടെയുള്ളവര്‍ ഒളിവിലാണ്.