എല്ലാം ശുഭമാകാന്‍ ഫ്‌ളാറ്റിനു മുന്നില്‍ പൂജ, മരടില്‍ ഒരുക്കങ്ങളെല്ലാം പൂര്‍ത്തിയായി

കൊച്ചി: മരടില്‍ സുപ്രീം കോടതി പൊളിച്ചു മാറ്റാന്‍ നിര്‍ദേശിച്ച 4 ഫ്‌ളാറ്റുകളില്‍ രണ്ടെണ്ണം ഇന്ന് നിയന്ത്രിത സ്‌ഫോടനത്തിലൂടെ തകര്‍ക്കും. ഇതിനുമുന്നോടിയായി ഫ്‌ളാറ്റ് പൊളിക്കുന്നതിനു കരാറെടുത്ത കമ്പനിയുടെ പൂജയും നടന്നു. ഹോളിഫെയ്ത്ത് എച്ച് ടു ഒ ഫ്‌ളാറ്റിന് മുന്നിലാണ് പൂജ നടത്തിയത്.

ഹോളിഫെയ്ത്ത് എച്ച്ടുഒയും ആല്‍ഫ സെറീനുമാണ് ഇന്ന് നിലംപതിക്കുക. ബാക്കിയുള്ള ഫ്‌ളാറ്റുകള്‍ നാളെ പൊളിക്കും. രാവിലെ 11 മണിയോടെ ഹോളിഫെയ്ത്ത് എച്ച്ടുഒയാണ് ആദ്യം പൊളിക്കുക. അഞ്ച് മിനിറ്റിനുശേഷമാണ് ആല്‍ഫ സെറിന്‍ പൊളിക്കുന്നത്. ജെയിന്‍ കോറല്‍ കോവ്, ഗോള്‍ഡന്‍ കായലോരം എന്നിവ നാളെ തകര്‍ക്കും.

ഉദ്യോഗസ്ഥര്‍ അവസാനഘട്ട പരിശോധനകള്‍ നടത്തി വരികയാണ്. ഈ രണ്ട് ഫ്‌ളാറ്റുകള്‍ക്കും സമീപത്തുള്ളവരെ ഒഴിപ്പിച്ചു. ഫ്‌ളാറ്റുകളുടെ 200 മീറ്റര്‍ ചുറ്റളവില്‍ രാവിലെ എട്ട് മുതല്‍ വൈകീട്ട് അഞ്ചു മണിവരെ നിരോധനാജ്ഞയാണ്.