സിദ്ദിഖിനെ തള്ളി എഎംഎംഎ; ആമിറിനും അക്ഷയ്ക്കും പിന്തുണ

മീടൂ ആരോപണങ്ങളെത്തുടര്‍ന്ന് ബോളിവുഡ‍് താരങ്ങളായ ആമിര്‍ ഖാനും അക്ഷയ് കുമാറും സഹപ്രവര്‍ത്തകരുടെ തൊഴിൽസാധ്യത നിഷേധിച്ചത് തെറ്റായിപ്പോയെന്ന നടൻ സിദ്ദിഖിന്‍റെ പ്രസ്താവന തള്ളി താരസംഘടന എഎംഎംഎ. ബോളിവുഡ് താരങ്ങളുടെ നടപടിയ്ക്ക് പിന്തുണയുമായി സംഘടന രംഗത്തെത്തി.

ഔദ്യോഗികവക്താവായ ജഗദീഷാണ് ഇരുതാരങ്ങള്‍ക്കും സംഘടനയുടെ പിന്തുണയര്‍പ്പിച്ച് രംഗത്തെത്തിയത്. സഹപ്രവര്‍ത്തകര്‍ക്കെതിരെ ലൈംഗികാരോപണം ഉന്നയിക്കപ്പെട്ടതിനു പിന്നാലെ പ്രൊജക്ടുകള്‍ ബഹിഷ്കരിച്ച താരങ്ങളുടെ നടപടിയ ജഗദീഷ് പിന്തുണച്ചു.

ബോളിവുഡ‍് താരങ്ങളുടെ നടപടിയെ വിമര്‍ശിച്ച നടൻ സിദ്ദിഖിന്‍റെ പത്രസമ്മേളനം സംഘടനയുടെ അനുമതിയില്ലാതെയാണെന്ന് ജഗദീഷ് അറിയിച്ചു. സിദ്ദിഖിന്‍റെ വാക്കുകളിൽ ജഗദീഷ് ഖേദം പ്രകടിപ്പിച്ചു. ബോളിവുഡ് താരങ്ങളെപ്പറ്റി സിദ്ദിഖ് പറഞ്ഞ കാര്യങ്ങളിൽ വിശദീകരണം വേണമെന്ന് തോന്നുന്നതു കൊണ്ടാണ് ഇത് അറിയിക്കുന്നതെന്നും ജഗദീഷ് പ്രസ്താവനയിൽ അറിയിച്ചു.

സംവിധായകൻ സാജിദ് ഖാനെതിരെ നിരവധി സ്ത്രീകള്‍ ലൈംഗികാരോപണം ഉയര്‍ത്തിയതിനെത്തുടര്‍ന്ന് ബോളിവുഡ് താരം അക്ഷയ് കുമാര്‍ ഹൗസ്‍‍ഫുള്‍ 4 ചിത്രത്തിൽ നിന്ന് പിന്മാറിയിരുന്നു. മറ്റൊരു സംവിധായകൻ സുഭാഷ് കപൂറിനെതിരെ ലൈംഗികാരോപണം ഉയര്‍ന്നതിനെത്തുടര്‍ന്ന് നടൻ ആമിർ ഖാനും ചിത്രത്തിൽ നിന്ന് പിന്മാറിയിരുന്നു