ജലന്ധര്‍ ബിഷപ്പിനെതിരെ കൂടുതൽ വെളിപ്പെടുത്തലുകളുമായി കന്യാസ്ത്രീയുടെ അച്ഛൻ

കൊച്ചി: ജലന്ധര്‍ ബിഷപ്പ് ഫ്രാങ്കോ മുളയ്ക്കലിനെതിരെ കൂടുതൽ പരാതികൾ പുറത്ത്. കൂടുതൽ വെളിപ്പെടുത്തലുകളുമായി മറ്റൊരു കന്യാസ്ത്രീയുടെ അച്ഛൻ രംഗത്തെത്തിയതോടെയാണ് ജലന്ധര്‍ ബിഷപ്പ് കൂടുതൽ കുരുക്കിലേക്ക് വീഴുന്നത്. പീഡനത്തിനിരയായ കന്യാസ്ത്രീയെ ഭീഷണിപ്പെടുത്തി അപകീർത്തിപ്പെടുത്തുന്ന പരാതി എഴുതി വാങ്ങിയെന്നും സംഭവം പുറത്തു പറഞ്ഞാൽ കൊല്ലുമെന്ന് ഭീഷണിപ്പെടുത്തിയതായും കന്യാസ്ത്രീയുടെ അച്ഛൻ വ്യക്തമാക്കി.

മദര്‍ സുപ്പീരിറിന്‍റെ സാന്നിധ്യത്തിലായിരുന്നു ഭീഷണി. ഇക്കാര്യങ്ങൾ മകൾ 2017 നവംബറിൽ തന്നെ പറഞ്ഞിരുന്നെന്നും ജലന്ധറിൽ നിന്ന് കത്തെഴുതിയാണ് മകൾ ഇക്കാര്യം അറിയിച്ചതെന്നും കന്യാസ്ത്രീയുടെ അച്ഛൻ വ്യക്തമാക്കി. ഒരാഴ്ചയ്ക്കകം തന്നെ കര്‍ദ്ദിനാൾ ആലഞ്ചേരിയെ കണ്ട് ഇക്കാര്യങ്ങൾ ബോധിപ്പിച്ചിരുന്നതായും കന്യാസ്ത്രീയുടെ അച്ഛൻ വ്യക്തമാക്കി. മാധ്യമങ്ങൾ പോലും ഇക്കാര്യങ്ങൾ അറിയരുതെന്നാണ് കർദിനാൾ ആവശ്യപ്പെട്ടത്. ഉറപ്പായ നടപടിയുണ്ടാകുമെന്ന് പറഞ്ഞാണ് കര്‍ദ്ദിനാൾ തന്നെ മടക്കി അയച്ചതെന്നും അദ്ദേഹം പറഞ്ഞു. ഏഷ്യാനെറ്റ് ന്യൂസ് ചാനലിനോടാണ് തുറവൂർ സ്വദേശിയായ കന്യാസ്ത്രീയുടെ അച്ഛൻ ഇക്കാര്യങ്ങൾ വെളിപ്പെടുത്തിയത്.