കശ്മീരിൽ നാല് ഭീകരരെ സൈന്യം കൊലപ്പെടുത്തി

അനന്ത്നാഗ്: ജമ്മു കശ്മീരിലെ അനന്ത്നാഗ് ജില്ലയിൽ സൈന്യവുമായുള്ള ഏറ്റുമുട്ടലിൽ 4 ഭീകരര്‍ കൊല്ലപ്പെട്ടു. വെള്ളിയാഴ്ച പുലര്‍ച്ചെയുണ്ടായ ഏറ്റുമുട്ടലിൽ കൊല്ലപ്പെട്ടവരിലൊരാള്‍ ഐഎസിന്‍റെ കശ്മീര്‍ വിഭാഗമായ ഇസ്ലാമിക് സ്റ്റേറ്റ് ജമ്മു ആന്‍റ് കശ്മീര്‍ എന്ന സംഘടനയുടെ തലവനാണ്. ഏറ്റുമുട്ടലിൽ മൂന്ന് സൈനികര്‍ക്കും പരിക്കേറ്റിട്ടുണ്ട്.

പുലര്‍ച്ചെ നടന്ന ഏറ്റുമുട്ടലിൽ ഒരു നാട്ടുകാരനും കൊല്ലപ്പെട്ടതായി റിപ്പോര്‍ട്ടുകള്‍ വന്നിരുന്നു.

ദക്ഷിണ കശ്മീരിലെ ശ്രിഗുവാര മേഖലയിൽ തീവ്രവാദികള്‍ നിലയുറപ്പിച്ചിട്ടുണ്ടെന്ന രഹസ്യവിവരത്തെത്തുടര്‍ന്ന് സൈന്യവും പോലീസും പ്രദേശത്ത് തെരച്ചിൽ നടത്തിയിരുന്നു. പ്രദേശത്തെ വീട്ടിൽ താവളമുറപ്പിച്ചിരുന്ന ഭീകരര്‍ സൈന്യത്തിന് നേരെ വെടിയുതിര്‍ക്കുകയായിരുന്നു. വെടിവെയ്പിൽ വീട്ടുടമ മരിക്കുകയും ഇയാളുടെ ഭാര്യയ്ക്ക് പരിക്കേൽക്കുകയും ചെയ്തു.