കേരളം നമ്പർ വൺ; സംസ്ഥാനത്തെ അഭിനന്ദിച്ച് ബ്രെറ്റ് ലീ

തിരുവനന്തപുരം: ആരോഗ്യ മേഖലയിലെ പ്രവർത്തനങ്ങളിൽ കേരളത്തെ അഭിനന്ദിച്ച് ഓസീസ് ക്രിക്കറ്റ് ഇതിഹാസം ബ്രെറ്റ് ലീ. കോക്ളിയറിന്‍റെ ആഗോള ഹിയറിങ് അംബാസിഡറായ ലീ മുഖ്യമന്ത്രി പിണറായി വിജയനെയും ആരോഗ്യ മന്ത്രി കെ.കെ.ശൈലജയെയും സന്ദർശിച്ചു.

"കേരളം നമ്പർ വണ്ണാണ്. കേരളം ചെയ്യുന്നതാണ് പലപ്പോഴും ഇന്ത്യയിലെ മറ്റ് സംസ്ഥാനങ്ങൾ മാതൃകയാക്കുന്നത്," ബ്രെറ്റ് ലീ പറഞ്ഞു. കേരളത്തിലെ ആശുപത്രികളില്‍ ജനിക്കുന്ന കുഞ്ഞുങ്ങള്‍ക്കെല്ലാം കേള്‍വി ശേഷി സംബന്ധിച്ച പരിശോധന നിര്‍ബന്ധമാക്കുന്നതിനെക്കുറിച്ച് ബ്രെറ്റ് ലീ മുഖ്യമന്ത്രിയുമായി ചർച്ച നടത്തി.

നവജാത ശിശുക്കളിലെ പരിശോധന സംബന്ധിച്ച വിവരങ്ങള്‍ തല്‍സമയം രേഖപ്പെടുത്താനും ഡിസ്ട്രിക്ട് ഏര്‍ളി ഇന്‍റര്‍വെന്‍ഷന്‍ കേന്ദ്രങ്ങള്‍, മെഡിക്കല്‍ കോളേജുകള്‍ എന്നിവ അടക്കമുള്ള സ്ഥാപനങ്ങളുമായി പങ്കുവെക്കാനും നിലവിൽ സംവിധാനങ്ങൾ സർക്കാർ ഏർപ്പെടുത്തിയിട്ടുണ്ടെന്ന് മുഖ്യമന്ത്രിയുടെ ഓഫീസ് അറിയിച്ചു.