കൊച്ചിയിൽ ഓട്ടോ പണിമുടക്ക്; യാത്രക്കാർ വലയുന്നു

കൊച്ചി: എറണാകുളം ജില്ലയിൽ ഓട്ടോ ഡ്രൈവ‍ർമാരുടെ മിന്നൽ പണിമുടക്ക്. ഊബർ തടഞ്ഞതിന്റെ പേരിൽ ഓട്ടോ ഡ്രൈവർമാരെ പോലീസ് കസ്റ്റഡിയിൽ എടുത്തതിൽ പ്രതിഷേധിച്ചാണ് പണിമുടക്ക്.

ആദ്യം എറണാകുളം നോര്‍ത്ത്, സൗത്ത് റെയില്‍വേ സ്റ്റേഷൻ, കെഎസ്‌ആര്‍ടിസി ബസ് സ്റ്റാന്‍റ് എന്നീ പരിസരത്തുള്ള ഒാട്ടോ ഡ്രൈവര്‍മാരാണ് പണിമുടക്ക് തുടങ്ങിയത്. പിന്നീടത് കോര്‍പ്പറേഷന്‍ പരിധിയിലേക്ക് വ്യാപിക്കുകയായിരുന്നു.

ഇന്ന് പുലർച്ചെ രണ്ട് മണിക്ക് എറണാകുളം സൗത്ത് റെയില്‍വേ സ്റ്റേഷനില്‍ എത്തിയ ഓണ്‍ലൈന്‍ ടാക്സി, ഓട്ടോ ഡ്രൈവര്‍മാര്‍ തടഞ്ഞു. ഇതറിഞ്ഞെത്തിയ പോലീസ് ടാക്സി തടഞ്ഞവർക്കെതിരെ നടപടിയെടുത്തു.

പോലീസിനെ ഓട്ടോ ഡ്രൈവർമാർ സംഘടിതമായി നേരിട്ടതോടെ പ്രശ്നം രൂക്ഷമാകുകയായിരുന്നു. തുടര്‍ന്ന് അന്‍പതിലേറെ പേരെ പോലീസ് കസ്റ്റഡിയിലെടുത്തു.

ഓട്ടോ ഡ്രൈവർമാരുടെ മിന്നൽ പണിമുടക്കിനെ തുടർന്ന് രാവിലെ റെയില്‍വേ സ്റ്റേഷനുകളിലും കെഎസ്‌ആര്‍ടിസി ബസ് സ്റ്റാന്‍ഡിലും എത്തിയ യാത്രക്കാര്‍ വലഞ്ഞു.

Auto strike in Kochi today.