ജയിൽപുള്ളികളോടു സഹാനുഭൂതി വേണം: മുഖ്യമന്ത്രി

തിരുവനന്തപുരം: ജയിലിൽ കഴിയുന്നവരെല്ലാം ക്രിമിനൽ സ്വഭാവമുള്ളവരല്ലെന്ന് മുഖ്യമന്ത്രി പിണറായി വിജയൻ. അവര്‍ക്ക് അര്‍ഹതപ്പെട്ട ആനുകൂല്യം നിഷേധിക്കരുതെന്നും അവരെ ശരിയായ പാതയിലേയ്ക്ക് നയിക്കാൻ തയ്യാറാകണമെന്നും മുഖ്യമന്ത്രി പറഞ്ഞു. ജയിലിനകത്ത് ഉള്ളവരോട് സഹാനുഭൂതി വേണമെന്നും എന്നാൽ ഉദ്യോഗസ്ഥര്‍ അവര്‍ക്ക് തെറ്റായി ഒന്നും ചെയ്തുകൊടുക്കരുതെന്നും മുഖ്യമന്ത്രി നിര്‍ദേശിച്ചു. പൂജപ്പുരയിൽ ജയിൽ ജീവനക്കാരുടെ പാസിങ് ഔട്ട് പരേഡിൽ പങ്കെടുക്കുകയായിരുന്നു അദ്ദേഹം.

ടിപി ചന്ദ്രശേഖരൻ വധക്കേസിലെ മുഖ്യപ്രതിയായ സിപിഎം നേതാവ് പി കെ കുഞ്ഞനന്തന് മാനദണ്ഡങ്ങള്‍ മറികടന്ന് ശിക്ഷാ ഇളവ് നല്‍കാൻ നീക്കമുണ്ടെന്ന ആരോപണങ്ങള്‍ക്കിടെയാണ് മുഖ്യമന്ത്രിയുടെ പരാമര്‍ശം. നിയമപരമായ പരിശോധനകള്‍ പൂര്‍ത്തിയാക്കിയിട്ടേ ആരെയും വിട്ടയയ്ക്കാവൂ. 70 വയസ്സ് കഴിഞ്ഞവരെ മോചിപ്പിക്കണമെന്ന് ജയിൽ ചട്ടപരിഷ്കരണ കമ്മീഷൻ നിര്‍ദേശിച്ചിട്ടുണ്ട് എന്നുമായിരുന്നു മുഖ്യമന്ത്രിയുടെ വിശദീകരണം.