ബെന്നി ബെഹനാന്‍ യുഡിഎഫ് കണ്‍വീനര്‍ സ്ഥാനം രാജിവെച്ചു

കൊച്ചി: യുഡിഎഫ് കണ്‍വീനര്‍ സ്ഥാനത്ത് നിന്ന് രാജിവെച്ച് ബെന്നി ബെഹനാന്‍. ഇന്ന് രാജിക്കത്ത് നല്‍കുമെന്ന് ബെന്നി ബെഹനാന്‍ പറഞ്ഞു. കണ്‍വീനര്‍ സ്ഥാനവുമായി ബന്ധപ്പെട്ട മാധ്യമ വാര്‍ത്തകള്‍ വേദനിപ്പിച്ചെന്ന് അദ്ദേഹം പ്രതികരിച്ചു. ദേശീയ നേതൃത്വത്തെ വിവരം അറിയിച്ചിട്ടുണ്ടെന്ന് അദ്ദേഹം വാര്‍ത്താസമ്മേളനത്തില്‍ അറിയിച്ചു.

Also Read: ബെന്നി ബെഹനാന്‍ യുഡിഎഫ് കണ്‍വീനര്‍ സ്ഥാനം രാജിവെച്ചു

'തന്റെ സ്ഥാനത്തെ കുറിച്ച് കഴിഞ്ഞ ദിവസങ്ങളായി മാധ്യമങ്ങളില്‍ വിവാദങ്ങള്‍ ഉണ്ടാക്കുകയാണ്. അത് കൂടുതല്‍ വഷളാക്കാന്‍ ആഗ്രഹിക്കുന്നില്ല', ബെന്നി ബെഹനാന്‍ വാര്‍ത്താ സമ്മേളനത്തിലൂടെ പറഞ്ഞു.

'മാധ്യമങ്ങളില്‍ വന്ന വാര്‍ത്ത വേദനിപ്പിച്ചു. ഒരു ദേശീയ പാക്കേജിന്റെ അടിസ്ഥാനത്തിലാണ് താന്‍ കണ്‍വീനറായത്. അത് ഒഴിവാക്കുകയാണ്. സ്ഥാനവുമായി ബന്ധപ്പെട്ട് വിവാദം ഉണ്ടാകുന്നത് വിഷമം ഉണ്ടാക്കുന്ന കാര്യമാണ്. അടിസ്ഥാന രഹിതമായ ആരോപണത്തില്‍ മറുപടി പറയാതെ വയ്യ. നല്ലത് മാറി നില്‍ക്കുന്നതാണ്. പാര്‍ട്ടിക്ക് വേണ്ടി ശക്തമായി നിലകൊള്ളും', ബെന്നി ബെഹനാന്‍ വ്യക്തമാക്കി.

സ്ഥാനമൊഴിയണമെന്ന് ആരും ഇതുവരെ ആവശ്യപ്പെട്ടിട്ടില്ല. എം എം ഹസനെ കണ്‍വീനറാക്കണമെന്ന നിര്‍ദ്ദേശം കെപിസിസി ഹൈക്കമാന്‍ഡിന് നല്‍കിയിരുന്നു. തീരുമാനം ഉടന്‍ പ്രഖ്യാപിക്കുമെന്ന് അദ്ദേഹം പറഞ്ഞു.

മുമ്പ് പാര്‍ലമെന്റ് തെരഞ്ഞെടുപ്പ് സമയത്ത് തന്നെ കണ്‍വീനര്‍ സ്ഥാനം ഒഴിയണമെന്നുള്ള നിര്‍ദ്ദേശം എ ഗ്രൂപ്പിനുള്ളില്‍ നിന്ന് ഉമ്മന്‍ ചാണ്ടി മുന്നോട്ട് വെച്ചിരുന്നു. എ ഗ്രൂപ്പിലെ എം എം ഹസനെ കണ്‍വീനര്‍ ആക്കണമെന്നായിരുന്നു നിര്‍ദ്ദേശം. എന്നാല്‍, ആ നിര്‍ദ്ദേശം അംഗീകരിക്കാന്‍ ബെന്നി ബെഹനാന്‍ തയ്യാറായിരുന്നില്ല.

Also Read: 'ജനങ്ങൾ സഹകരിച്ചില്ലെങ്കിൽ' അടച്ചിടേണ്ടി വരും: സംസ്ഥാനത്തിന് ഭീഷണി 3 കാര്യങ്ങളെന്ന് ആരോഗ്യമന്ത്രി

ഉമ്മന്‍ ചാണ്ടിയെ ആദരിക്കുന്ന ചടങ്ങുമായി ബന്ധപ്പെട്ട് തിരുവനന്തപുരത്ത് ഉണ്ടായിരുന്ന സമയത്ത് രാജി കാര്യം ചര്‍ച്ചയായിരുന്നെന്നും പാര്‍ലമെന്റ് സമ്മേളനങ്ങള്‍ക്ക് ശേഷം രാജി വെയ്ക്കാമെന്ന് ബെന്നി അറിയിച്ചതാണെന്നും അതനുസരിച്ചാണ് രാജി പ്രഖ്യാപനമെന്നാണ് കെ പി സി സി വിശദീകരിച്ചത്.