കോട്ടയം ഭാരത് ആശുപത്രി സമരത്തിലിരുന്ന നേഴ്സ് ആത്മഹത്യക്ക് ശ്രമിച്ചു

കോട്ടയം: ഭാരത് ആശുപത്രിയിൽ നേഴ്സ് ആത്മഹത്യക്ക് ശ്രമിച്ചു. മാനേജ്മെന്‍റിനെതിരെ സമരം നടത്തി വന്ന നേഴ്സുമാരില്‍ ഒരാളായ ചിങ്ങവനം സ്വദേശിനി ബിജിതയാണ് ആത്മഹത്യയ്ക്ക് ശ്രമിച്ചത്. സമരം കഴിഞ്ഞ് വീട്ടിലെത്തിയ ബിജിത മാനേജ്മെന്‍റിനെതിരെ കത്ത് എഴുതിയ ശേഷമാണ് ജീവനൊടുക്കാൻ ശ്രമിച്ചത്. സമരം നൂറാം ദിവസത്തിലേക്ക് അടുത്തിട്ടും പ്രശ്ന പരിഹാരത്തിന് മാനേജ്മെന്‍റ് തയ്യാറാകാതെ വന്നതോടെയാണ് ബിജിത ജീവനൊടുക്കാൻ ശ്രമിച്ചത്. തന്‍റെ ആത്മഹത്യാ ശ്രമത്തിന് പൂര്‍ണ്ണ ഉത്തരവാദി ഭാരത് മാനേജ്മെന്‍റാണെന്നാണ് ആത്മഹത്യാകുറിപ്പിൽ ബിജിത എഴുതിയിരുന്നത്. പനിക്ക് കഴിക്കുന്ന ഗുളിക അമിതമായി കഴിക്കുന്നത് ബിജിതയുടെ ഭര്‍ത്താവ് തക്കസമയത്ത് കണ്ടതിനെ തുടര്‍ന്ന് ഇവരെ ഉടന്‍ ആശുപത്രിയില്‍ എത്തിക്കുകയായിരുന്നു.

നിരാഹാര സമരം തുടങ്ങിയിട്ടും ഇവരുടെ കാര്യത്തില്‍ മാനേജ്മെന്‍റോ ഭരണകൂടമോ യാതൊരു നടപടിയും എടുത്തിരുന്നില്ല. 5 പേര്‍ ഇതിനോടകം തന്നെ നിരാഹാരസമരം അനുഷ്ഠിച്ചു വരികയാണ്. എന്നാല്‍ ഇപ്പോള്‍ നിരാഹാരം അനുഷ്ഠിക്കുന്നവരെ അറസ്റ്റ് ചെയ്ത് നീക്കാന്‍ പോലും പോലീസ് തയ്യാറാകുന്നില്ലെന്നാണ് ഇവര്‍ക്കിടയിൽ ഉയരുന്ന പരക്കെയുള്ള ആക്ഷേപം. നിലവിലെ സാഹചര്യത്തില്‍ സമരം ശക്തമാക്കാനാണ് നേഴ്സുമാര്‍ തീരുമാനിച്ചിരിക്കുന്നത്.

Bharath Hospital Nurse Suicide Attempt