ചരിത്രത്തിലെ ഏറ്റവും വലിയ പിഎസ്‍‍സി പരീക്ഷ ഇന്ന്

തിരുവനന്തപുരം: കേരള പിഎസ്‍‍സിയുടെ ചരിത്രത്തിൽ ഏറ്റവുമധികം ഉദ്യോഗാർഥികൾ പങ്കെടുക്കുന്ന പരീക്ഷ ഇന്നു നടക്കും. കേരള സ്റ്റേറ്റ് ബിവറേജസ് കോർപറേഷനിലെ എൽഡി ക്ലാർക്ക് തസ്തികയിലേക്കുള്ള പരീക്ഷയാണ് ഇന്ന് നടക്കുന്നത്. സംസ്ഥാനത്തെ 2608 കേന്ദ്രങ്ങളിലായാണ് പരീക്ഷ നടത്തുന്നത്. 6,34,283 ഉദ്യോഗാർഥികളാണ് പരീക്ഷയ്ക്ക് വേണ്ടി അപേക്ഷിച്ചിരിക്കുന്നത്. ഉച്ചക്ക് ശേഷം രണ്ടു മുതലാണ് പരീക്ഷ നടക്കുക. ഒന്നേകാൽ മണിക്കൂറാണ് പരീക്ഷക്കായി അനുവദിച്ചിരിക്കുന്നത്.

പരീക്ഷ നടത്തിപ്പിനായി തന്നെ 10 കോടിയോളം രൂപ ചെലവാകുമെന്നാണ് കണക്കാക്കുന്നത്. ഒരു ഉദ്യോഗാർഥിക്ക് 150 രൂപയിലേറെ ചെലവ് വരുമെന്നാണ് പിഎസ്‍‍സിയുടെ വിലയിരുത്തല്‍. അൺ എയ്ഡഡ് സ്കൂളുകളിലടക്കം പിഎസ്‍‍സി പരീക്ഷ നടത്തിപ്പിനായി ഒരുക്കുന്നുണ്ട്. തിരുവനന്തപുരത്താണ് ഏറ്റവുമധികം പരീക്ഷാ കേന്ദ്രങ്ങളുള്ളത് (495 എണ്ണം). ഏറ്റവും കുറവ് ഉദ്യോഗാർഥികളുള്ളത് കാസർഗോഡ് ജില്ലയിലാണ് (62).

കഴിഞ്ഞ വർഷം യൂണിവേഴ്സിറ്റി അസിസ്റ്റൻ്റ് തസ്തികയിലേക്കു നടത്തിയ പരീക്ഷയായിരുന്നു ഇതുവരെ ഏറ്റവുമധികം ഉദ്യോഗാർഥികൾ പങ്കെടുത്ത പരീക്ഷ. ഈ തസ്തികയിലേക്കു 5,41,823 ഉദ്യോഗാർഥികളാണ് അപേക്ഷിച്ചിരുന്നത്. മൂന്നരലക്ഷത്തിലേറെ പേർ പരീക്ഷ അഭിമുഖീകരിച്ചിരുന്നു.