'ദൈവത്തിന് നന്ദി പറയുന്നു, ദൈവം പ്രാര്‍ഥന കേട്ടു': സിസ്റ്റര്‍ അഭയയുടെ സഹോദരൻ ബിജു

കൊച്ചി: സിസ്റ്റര്‍ അഭയ കൊലക്കേസിൽ പ്രതികള്‍ കുറ്റക്കാരാണെന്ന് കോടതി വിധിച്ചതിനു പിന്നാലെ പ്രതികരണവുമായി കൊല്ലപ്പെട്ട അഭയയുടെ സഹോദരൻ ബിജു. ദൈവത്തിനു നന്ദി പറയുന്നുവെന്നും ദൈവം തങ്ങളുടെ പ്രാര്‍ഥന കേട്ടെന്നുമായിരുന്നു ബിജുവിൻ്റെ പ്രതികരണം. സി. അഭയയുട ജീവിച്ചിരിക്കുന്ന ഏക കുടുംബാംഗമാണ് ബിജു.

"ദൈവത്തിന് നന്ദി പറയുന്നു, ദൈവം പ്രാർഥന കേട്ടു" ബിജു ഏഷ്യാനെറ്റ് ന്യൂസിനോട് വീഡിയോ കോൺഫറനസിലൂടെ സംസാരിക്കുമ്പോള്‍ പറഞ്ഞു. ദുബായിൽ നിന്നായിരുന്നു ബിജുവിൻ്റെ പ്രതികരണം. 28 വര്‍ഷത്തിനു ശേഷമാണ് കോടതി വിധിയുണ്ടാകുന്നതെന്നും കേരളത്തിൽ ഇങ്ങനെയൊരു കേസ് ആദ്യമാണെന്നും ബിജു പറഞ്ഞു. മാധ്യമങ്ങള്‍ക്കും പൊതുപ്രവര്‍ത്തകനായ ജോമോൻ പുത്തൻപുരയ്ക്കും ബിജു നന്ദി പറഞ്ഞു. ഈ കേസ് തെളിയുമെന്ന് വിചാരിച്ചിരുന്നില്ലെന്നും 20 ശതമാനം പ്രതീക്ഷ മാത്രമാണ് ഉണ്ടായിരുന്നതെന്നും അദ്ദേഹം വ്യക്തമാക്കി. "20 മിനിട്ട് മുൻപു വരെ ഞാൻ വിചാരിച്ചിരുന്നത് കുറ്റം തെളിയില്ലെന്നാണ്." അദ്ദേഹം പറഞ്ഞു. "ആ ജഡ്ജിയുടെ നല്ല മനസ്സിന് നന്ദി." ബിജു കൂട്ടിച്ചേര്‍ത്തു.

Also Read: സിസ്റ്റര്‍ അഭയ കേസ്: ഫാ. തോമസ് കോട്ടൂരും സിസ്റ്റര്‍ സെഫിയും കുറ്റക്കാര്‍, ശിക്ഷാവിധി നാളെ

"എന്നെയും കുടുംബത്തെയും സഹായിച്ച അച്ചന്മാരുണ്ട്. കന്യാസ്ത്രീകളുണ്ട്. മറ്റു സഭകളിൽപ്പെട്ട അച്ചന്മാരുണ്ട്. അവര്‍ക്കെല്ലാം നന്ദി." ബിജു വ്യക്തമാക്കി. ലോക്കൽ പോലീസിന് ഒരു മണിക്കൂര്‍ കൊണ്ട് തെളിയിക്കാവുന്ന കേസ് ആയിരുന്നുവെന്നും എന്നാൽ മന്ത്രിമാരും എംഎൽഎമാരും അടക്കം കേസിൽ ഇടപെട്ടതുകൊണ്ടാണ് നീതി വൈകിയതെന്നും അദ്ദേഹം ആരോപിച്ചു. പണം വാങ്ങിയ പോലീസ് ഉദ്യോഗസ്ഥരെ പോലും അറിയാമെന്നും എന്നാൽ ആരുടെയും പേര് പറയുന്നില്ലെന്നും അദ്ദേഹം പറഞ്ഞു.

Also Read: സി. അഭയ കേസ് വിധി: തത്സമയവിവരങ്ങൾ

തിരുവനന്തപുരം പ്രത്യേക സിബിഐ കോടതിയാണ് ഇന്ന് അഭയ കേസിൽ വിധി പറഞ്ഞത്. പ്രതികളായ ഫാ. തോമസ് കോട്ടൂരും സിസ്റ്റര്‍ സെഫിയും കുറ്റക്കാരാണെന്നായിരുന്നു കോടതി ഇന്ന് കണ്ടെത്തിയത്. 1992ലാണ് കോട്ടയത്തെ പയസ് ടെൻത് മഠത്തിലെ കിണറ്റിൽ സി. അഭയയെ മരിച്ച നിലയിൽ കണ്ടെത്തിയത്. തുടര്‍ന്ന് ലോക്കൽ പോലീസും ക്രൈം ബ്രാഞ്ചും അന്വേഷിച്ച ശേഷമാണ് കേസിൽ സിബിഐ അന്വേഷിച്ച് ഒടുവിൽ വിധി വന്നത്.