Trupti Desai: തൃപ്തിയെയും ബിന്ദു അമ്മിണിയെയും തിരിച്ചയയ്ക്കുമെന്ന് പോലീസ്; ബിജെപി പ്രതിഷേധം അവസാനിച്ചു

കൊച്ചി: ശബരിമല ദര്‍ശനം നടത്താൻ കേരളത്തിലെത്തുമെന്ന് ദിവസങ്ങള്‍ക്ക് മുൻപേ അറിയിച്ച വനിതാവാകാശ പ്രവര്‍ത്തക തൃപ്തി ദേശായി ഇന്ന് പുലര്‍ച്ചെയാണ് കൊച്ചി വിമാനത്താവളത്തിലെത്തിയത്. തൃപ്തി ദേശായിയുടെ നേതൃത്വത്തിലുള്ള ആറംഗ ഭൂമാതാ ബ്രിഗേഡ് സംഘവും കഴിഞ്ഞ മണ്ഡലകാലത്ത് സന്നിധാനത്തെത്തി ദര്‍ശനം നടത്തിയ ബിന്ദു അമ്മിണിയും കൊച്ചിയിൽ ബിജെപി, എഎച്ച്പി പ്രവര്‍ത്തകരുടെ നേതൃത്വത്തിൽ നടക്കുന്ന വൻ പ്രതിഷേധം നേരിട്ടു. പോലീസ് സുരക്ഷ ആവശ്യപ്പെടാനായി കൊച്ചി കമ്മീഷണര്‍ ഓഫീസിലെത്തിയ ബിന്ദു അമ്മിണിയ്ക്ക് നേര്‍ക്ക് ഹിന്ദു ഹെൽപ്പ്‍‍ലൈൻ പ്രവര്‍ത്തകൻ പെപ്പര്‍ സ്പ്രേ ആക്രമണം നടത്തി. ഇയാളെ പോലീസ് കസ്റ്റഡിയിലെടുത്തു. ബിന്ദു അമ്മിണിയുടെ ആവശ്യപ്രകാരം ഇവരെ ജനറൽ ആശുപത്രിയിലേയ്ക്ക് മാറ്റിയിട്ടുണ്ട്. കൊച്ചി കമ്മീഷണര്‍ ഓഫീസിലാണ് തൃപ്തി ദേശായിയും സംഘവുമുള്ളത്.

11:00 AM | കൊച്ചിയിൽ കമ്മീഷണര്‍ ഓഫീസിനു മുന്നിൽ ബിജെപിയുടെ നേതൃത്വത്തിൽ നടത്തിയ പ്രതിഷേധ പ്രകടനം അവസാനിച്ചു. ശബരിമലയ്ക്ക് പോകാൻ തൃപ്തി ദേശായിയ്ക്കും സംഘത്തിനും പോലീസ് സംരക്ഷണം നല്‍കില്ലെന്ന് വ്യക്തമാക്കിയ സാഹചര്യത്തിലായിരുന്നു പ്രതിഷേധം അവസാനിച്ചത്. ശബരിമല ദര്‍ശനം നടത്താനെത്തിയ ഭൂമാതാ ബ്രിഗേഡ‍് സംഘത്തെയും ബിന്ദു അമ്മിണിയെയും തിരിച്ചയയ്ക്കുമെന്നാണ് പോലീസ് പറയുന്നത്.

10:57 AM | തൃപ്തി ദേശായിയ്ക്കും സംഘത്തിനും സുരക്ഷ നൽകില്ലെന്ന് മന്ത്രി എ കെ ബാലൻ അറിയിച്ചു. ശബരിമലയിലെ സമാധാനാന്തരീക്ഷം തക‍ര്‍ക്കാൻ അനുവദിക്കില്ല. മനുഷ്യാവകാശ ലംഘനം അനുവദിക്കില്ലെന്നും മന്ത്രി കൂട്ടിച്ചേര്‍ത്തു.

10:34 AM | ശബരിമല തീര്‍ത്ഥാടനം അലങ്കോലപ്പെടുത്താനുള്ള ശ്രമത്തിന്‍റെ ഭാഗമാണ് തൃപ്തി ദേശായിയുടെ നീക്കമെന്ന് ദേവസ്വം ബോര്‍ഡ്. സുപ്രീം കോടതി വിധിയിൽ അവ്യക്തതയുണ്ടെന്നും ഇത് നീക്കേണ്ടതുണ്ടെന്നും ദേവസ്വം ബോര്‍ഡ് അറിയിച്ചു.

10:30 AM | "തൃപ്തി ദേശായിയുടെയും സംഘത്തിൻ്റെയും ഇന്നത്തെ വരവിൽ ഗൂഢാലോചനയുണ്ടെന്ന സംശയം സ‍ര്‍ക്കാരിനുണ്ട്. ബിജെപിയ്ക്കും ആർഎസ്എസിനും സ്വാധീനമുള്ള മഹാരാഷ്ട്രയിലെ പൂനെയിൽ നിന്ന് പുലര്‍ച്ചെ അഞ്ച് മണിയ്ക്ക് കൊച്ചിയിൽ എത്തിയയും ഇത് ഒരു മാധ്യമം മാത്രം അറിഞ്ഞതും സംശയാസ്പദമാണ്. ഇതിനു പിന്നിൽ കൃത്യമായ ഗൂഢാലോചനയും തിരക്കഥയുമുണ്ട്. സമാധാനപരമായി മുന്നേറുന്ന തീര്‍ത്ഥാടനം സംഘര്‍ഷഭരിതമാക്കാനുള്ള ചിലരുടെ ശ്രമമാണ് ഇതിനു പിന്നിൽ."
- ദേവസ്വം മന്ത്രി കടകംപള്ളി സുരേന്ദ്രൻ

10:27 AM | യുവതീസംഘത്തിന് സുരക്ഷ നല്‍കില്ലെന്ന് നിലപാടിൽ പോലീസ്. സുരക്ഷയില്ലാതെ പോയാൽ പ്രതിഷേധമുണ്ടാകുമെന്നും ജീവനു വരെ ഭീഷണിയുണ്ടാകാമെന്നും പോലീസ് യുവതികളെ അറിയിച്ചു. തിരിച്ചു പോകുകയാണെങ്കിൽ വിമാനത്താവളം വരെ പോലീസ് സുരക്ഷയൊരുക്കാമെന്നും പോലീസ് ഇവരെ അറിയിച്ചു. അതേസമയം, പുറത്ത് കനത്ത പ്രതിഷേധം നടക്കുന്ന പശ്ചാത്തലത്തിൽ യുവതികളെ പോലീസ് കമ്മീഷണര്‍ ഓഫീസിൽ നിന്ന് പുറത്തേയ്ക്ക് പോകാൻ അനുവദിച്ചിട്ടില്ല. എന്നാൽ കേരള പോലീസിന്‍റെ നടപടിയ്ക്കെതിരെ കോടതിയലക്ഷ്യം ഫയൽ ചെയ്യുമെന്ന് തൃപ്തി ദേശായി അറിയിച്ചു.

10:08 AM | ശബരിമല ദർശനത്തിനായി എത്തിയ തൃപ്തി ദേശായിയും സംഘവുമായി ഡിഐജി ചർച്ച നടത്തുമെന്നാണ് വിവരം. ശബരിമല ദർശനത്തിന് അനുമതി നൽകുന്ന കോടതി ഉത്തരവുമായി വന്നാൽ ദർശനം അനുവദിക്കാമെന്ന നിലപാട് പോലീസ് സ്വീകരിക്കുമെന്നാണ് വിവരം. യുവതീസംഘത്തിനു നേർക്ക് കൊച്ചി കമ്മീഷണർ ഓഫീസിനു മുന്നിൽ ആരംഭിച്ച സമരം രണ്ട് മണിക്കൂർ പിന്നിട്ട ശേഷവും തുടരുകയാണ്. തൃപ്തി ദേശായിയെയും സംഘത്തെയും പോലീസ് മടക്കിയയ്ക്കണമെന്ന് പ്രതിഷേധക്കാർ ആവശ്യപ്പെട്ടു.