ബിനോയ്‌ക്ക് യാത്ര വിലക്കുണ്ടെന്ന് ബിനീഷ് കോടിയേരി

തിരുവനന്തപുരം: ദുബൈ ഭരണകൂടം ബിനോയ് കോടിയേരിക്ക് യാത്രാവിലക്ക് ഏർപ്പെടുത്തിയെന്ന് സ്ഥിരീകരിച്ച് സഹോദരൻ ബിനീഷ് കോടിയേരി. ദുബൈ കമ്പനിയുടെ 13 കോടി തട്ടിയെന്ന വാർത്ത തെറ്റാണെന്ന് ബിനീഷ് പറഞ്ഞു. ഒരു കോടി എഴുപത്തിരണ്ട് ലക്ഷം രൂപയാണ് നൽകാനുള്ളത്.

ഇപ്പോൾ വന്നിരിക്കുന്ന യാത്രാവിലക്കിനെതിരെ ബിനോയ് അടുത്താഴ്‌ച ദുബൈ കോടതിയിൽ അപ്പീൽ നൽകുമെന്നും ബിനീഷ് മാധ്യമങ്ങളോട് പറഞ്ഞു. താനും ബിനോയ്‌യും എന്ത് ചെയ്താലും സിപിഎം പാർട്ടി സെക്രട്ടറിയായ അച്ഛനെ അതിലേക്ക് വലിച്ചിഴക്കേണ്ട കാര്യമില്ലെന്ന് ബിനീഷ് പറഞ്ഞു.

"ബിനോയ് ഇപ്പോൾ നാട്ടിലേക്ക് വരേണ്ട അത്യാവശ്യം ഇല്ല, അവൻ അവിടെ തന്നെ നിൽക്കട്ടെ" ബിനീഷ് പറഞ്ഞു. തങ്ങൾ മക്കൾ എന്ത് ചെയ്താലും അതിന്‍റെ ഗുണവും ദോഷവും തങ്ങൾ തന്നെ അനുഭവിക്കണം. അച്ഛനെ അതിനിടയിൽ കൊണ്ടുവരേണ്ട കാര്യമില്ലെന്നും ബിനീഷ് വ്യക്തമാക്കി. ബിനോയ്‍ക്കെതിരെ ജാസ് ടൂറിസം കമ്പനി സിവിൽ കേസ് റജിസ്റ്റർ ചെയ്തതോടെയാണ് യാത്രാവിലക്ക് നിലവിൽ വന്നത്.