ഫ്രാങ്കോ ജയിൽമോചിതൻ; വൻസ്വീകരണമൊരുക്കി വിശ്വാസികൾ

പാലാ: കന്യാസ്ത്രീയെ ലൈംഗികമായി പീഡിപ്പിച്ച കേസിൽ ജാമ്യം ലഭിച്ച ജലന്ധര്‍ ബിഷപ്പ് ഫ്രാങ്കോ മുളയ്ക്കലിന് പാലാ സ‍‍ബ് ജയിലിനു പുറത്ത് വിശ്വാസികളുടെ സ്വീകരണം. പൂഞ്ഞാര്‍ എംഎൽഎ പി സി ജോര്‍ജും ജയിൽമോചിതനായ ബിഷപ്പിനെ സ്വീകരിക്കാനെത്തി. ബിഷപ്പിന് പിന്തുണയര്‍പ്പിച്ച് വിശ്വാസികള്‍ ജയിലിനു മുന്നിൽ ഐക്യദാര്‍ഠ്യപ്രാര്‍ഥന നടത്തി.

ജയിലിൽ നിന്ന് പുറത്തിറങ്ങി 24 മണിക്കൂറിനകം കേരളം വിടണമെന്നാണ് ജാമ്യവ്യവസ്ഥ. അതിനാൽ ഫ്രാങ്കോ ഇന്നു വൈകിട്ട് തന്നെ ജലന്ധറിലേയ്ക്ക് തിരിക്കും.

ജയിൽ കവാടത്തിലൂടെ പുറത്തുവന്ന ഫ്രാങ്കോയെ ബിഷപ്പ് കീ ജയ് വിളികളുമായാണ് വിശ്വാസികള്‍ സ്വീകരിച്ചത്. ജയിൽ ബിഷപ്പ് പുറത്തിറങ്ങുന്നതുവരെ പ്രാര്‍ഥനാഗീതങ്ങളുമായി വിശ്വാസികള്‍ കാത്തിരിക്കുകയായിരുന്നു. ഉച്ചയ്ക്ക് രണ്ട് മണിയോടെയാണ് ബിഷപ്പ് ഫ്രാങ്കോ ജയിലിന് പുറത്തിറങ്ങിയത്. തിങ്കളാഴ്ച ഹൈക്കോടതി ജാമ്യം അനുവദിച്ചിരുന്നെങ്കിലും ഉത്തരവ് ജയിലിൽ എത്തിക്കാൻ വൈകിയതിനാലാണ് ജയിലിൽ നിന്ന് പുറത്തിറങ്ങാൻ വൈകിയത്.


നൂറുകണക്കിന് വിശ്വാസികളും കന്യാസ്ത്രീകളും ബിഷപ്പിനെ സ്വീകരിക്കാൻ ജയിലിനു മുന്നിൽ തടിച്ചു കൂടിയെന്നാണ് റിപ്പോര്‍ട്ടുകള്‍. പ്രാര്‍ഥനയുമായി വിശ്വാസികള്‍ ജയിലിനു മുന്നിലെ റോഡിൽ കുത്തിയിരുന്നതോടെ ഇതുവഴിയുള്ള ഗതാഗതം തടസ്സപ്പെട്ടിരുന്നു.

ജാമ്യം ലഭിച്ചാലും വിദേശത്തേയ്ക്ക് പോകരുതെന്നും രണ്ടാഴ്ചയിലൊരിക്കൽ അന്വേഷണ ഉദ്യോഗസ്ഥനു മുന്നിൽ ഹാജരാകണമെന്നും ഹൈക്കോടതി ബിഷപ്പിനോട് നിര്‍ദേശിച്ചിട്ടുണ്ട്.

(ചിത്രങ്ങൾ: ജയകൃഷ്ണൻ, ടൈംസ് ഓഫ് ഇന്ത്യ)