ലൈംഗികപീഡനം: ജാമ്യാപേക്ഷയുമായി ബിഷപ്പ് വീണ്ടും ഹൈക്കോടതിയിൽ

കൊച്ചി: കന്യാസ്ത്രീയെ ലൈംഗികമായി പീഡിപ്പിച്ചെന്ന കേസിൽ ബിഷപ്പ് ഫ്രാങ്കോ വീണ്ടും ഹൈക്കോടതിയിൽ ജാമ്യാപേക്ഷ സമര്‍പ്പിച്ചു. അന്വേഷണം ഇതിനോടകം പൂര്‍ത്തിയായിട്ടുണ്ടെന്നും ജാമ്യം അനുവദിക്കണമെന്നുമാണ് ആവശ്യം. അന്വേഷണത്തോട് ബിഷപ്പ് പൂര്‍ണ്ണമായും സഹകരിച്ചിട്ടുണ്ടെന്നും ഹര്‍ജിയിൽ പറയുന്നു.

നിലവിൽ പാലാ സബ് ജയിലിൽ റിമാൻഡിൽ കഴിയുകയാണ് ജലന്ധര്‍ ബിഷപ്പ് ഫ്രാങ്കോ മുളയ്ക്കൽ. പാലാ ഒന്നാം ക്ലാസ് ജുഡീഷ്യൽ മജിസ്ട്രേറ്റ് കോടതി അദ്ദേഹത്തിന്‍റെ റിമാൻഡ് കാലാവധി ഈ മാസം 20 വരെ നീട്ടിയിരുന്നു. ഇതിനു മുൻപ് ബിഷപ്പ് ജാമ്യാപേക്ഷ സമര്‍പ്പിച്ചപ്പോള്‍ കോടതി നിരസിച്ചിരുന്നു.

ബിഷപ്പിനെതിരെ പ്രഥമദൃഷ്ഠ്യാ തെളിവുണ്ടെന്നാണ് കോടതി നിരീക്ഷിച്ചത്. അന്വേഷണം പ്രാരംഭഘട്ടത്തിലാണെന്നും ഉന്നതസ്വാധീനമുള്ള പ്രതി സാക്ഷികളെ സ്വാധീനിക്കാൻ സാധ്യതയുണ്ടെന്നും പ്രോസിക്യൂഷൻ വാദിച്ചു. മജിസ്ട്രേറ്റിനു മുന്നിൽ കന്യാസ്ത്രീ കൊടുത്ത രഹസ്യമൊഴിയിൽ ബിഷപ്പിനെതിരെ തെളിവുണ്ടെന്ന് കോടതി നിലപാട് വ്യക്തമാക്കിയിരുന്നു.