ശബരിമല വിഷയത്തില്‍ ബിജെപിയുടെ നിലപാട് കാപട്യമെന്ന് കെ സുധാകരന്‍

കണ്ണൂര്‍: ശബരിമല വിഷയത്തിലെ ബിജെപിയുടെ നിലപാട് കാപട്യമെന്ന് കെപിസിസി വര്‍ക്കിങ് പ്രസി‍ഡന്‍റ് കെ സുധാകരന്‍. ശബരിമല വിഷയത്തില്‍ ബിജെപി നാടകം കളിക്കുകയാണെന്നും സുധാകരന്‍ വാര്‍ത്താസമ്മേളനത്തില്‍ പറഞ്ഞു.

സ്ത്രീപ്രവേശനം അനുവദിച്ചുകൊണ്ടുള്ള സുപ്രീംകോടതി വിധിക്കെതിരെ കേന്ദ്ര സര്‍ക്കാരിന് നിയമ നിര്‍മ്മാണം നടത്താന്‍ സാധിക്കുമായിരുന്നു. എന്നാല്‍ ഇതു പറ്റില്ലെന്നാണ് ബിജെപിയുടെ സംസ്ഥാന അധ്യക്ഷനായ ശ്രീധരന്‍ പിള്ള പറയുന്നത്. അദ്ദേഹത്തെ പോലുള്ള ഒരാള്‍ ഇത്തരത്തില്‍ നുണപറയരുതെന്നും സുധാകരന്‍ കുറ്റപ്പെടുത്തി.

ശബരിമലയുടെ നിയന്ത്രണം ബിജെപി കീഴടക്കിയിരിക്കുകയാണ്. ശബരിമല തങ്ങളുടെ നിയന്ത്രത്തിലാണെന്ന സര്‍ക്കാരിന്‍റെ വാദം ഇവിടെ പൊളിയുകയാണെന്നും സുധാകരന്‍ കൂട്ടിച്ചേര്‍ത്തു.